دہلی اجلاس میں قرارداد منظور ، مودی کی قیادت میں این ڈی اے حکومت کی حمایت کااعلان
نئی دہلی: لوک سبھا انتخابات میں اکثریت حاصل کرنے کے بعد قومی جمہوری اتحاد (این ڈی اے) کی 15 پارٹیوں نے چہارشنبہ کو وزیر اعظم نریندر مودی کی لوک کلیان مارگ رہائش گاہ پر ایک اہم میٹنگ کی جس میں تمام پارٹیوں نے ایک قرارداد منظور کی۔ متفقہ قرارداد میں مودی کو اتحاد کا لیڈر منتخب کیا اور ان کی قیادت میں این ڈی اے حکومت کی حمایت کا اعلان کیا۔مودی کی صدارت میں منعقدہ اجلاس میں بی جے پی کے اہم قائدین کے علاوہ دوسرے سب سے بڑے اتحادی تلگو دیشم پارٹی کے سربراہ این چندرابابو نائیڈو، جنتا دل یو کے نتیش کمار، راجیو رنجن سنگھ اور سنجے جھا، ایل جے پی کے چراغ پاسوان، چیف منسٹر مہاراشٹرا ایکناتھ شنڈے، جنتا دل سیکولر رہنما ایچ ڈی کمار سوامی، ہندوستانی عوام پارٹی کے جیتن رام مانجھی، اپنا دل (سونی لال) کے رہنما انوپریہ پٹیل، جناسینا پارٹی کے پون کلیان، نیشنلسٹ کانگریس پارٹی کے سنیل ٹٹکرے اور پرفل پٹیل، راشٹریہ لوک دل کے جینت چودھری، یو پی پی ایل کے پرمود بوڈو، آسام گنا پریشد کے اتل بورا، ایس کے ایم کے اندر ہانگ سبا، آل جھارکھنڈ اسٹوڈنٹس یونین کے سدیش مہتو شامل ہوئے۔یہ میٹنگ تقریباً ڈیڑھ گھنٹہ تک جاری رہی جس میں حلیفوں نے مودی کی قیادت میں نئی این ڈی اے حکومت کی تشکیل کے لیے اپنی حمایت کے خطوط پیش کیے اور ایک قرار داد پاس کی کہ 140 کروڑ ہم وطنوں نے این ڈی اے کی عوامی فلاح و بہبود میں اپنا حصہ اداکیا ہے۔ مودی کی قیادت میں حکومت نے پچھلے 10 سالوں میں ملک ہر شعبے میں ترقی کرتے دیکھا ہے۔ ایک بہت طویل وقفے کے بعد تقریباً چھ دہائیوں کے بعد ہندوستان کے عوام نے مسلسل تیسری بار قطعی اکثریت کے ساتھ ایک مضبوط قیادت کا انتخاب کیا ہے۔قرارداد میں کہا گیاکہ ہم سب کو فخر ہے کہ 2024 کے لوک سبھا انتخابات این ڈی اے نے مودی کی قیادت میں متحد ہوکر لڑا اور جیتا۔ ہم سب متفقہ طور پر این ڈی اے لیڈر نریندر مودی کو اپنا لیڈر منتخب کرتے ہیں۔مودی کی قیادت میں این ڈی اے حکومت ملک کے غریب خواتین، نوجوان کسانوں اور استحصال زدہ، محروم اور مصیبت زدہ شہریوں کی خدمت کیلئے پرعزم ہے۔ این ڈی اے حکومت ملک کے ورثہ کے تحفظ اور ہمہ جہت ترقی کے ساتھ لوگوں کے معیار زندگی کو بہتر بنانے کا کام جاری رکھے گی۔