جھنجھنو :آل انڈیا مجلس اتحاد المسلمین (اے آئی ایم آئی ایم) کے صدر اسد الدین اویسی نے مصنوعات و خدمات ٹیکس (جی ایس ٹی) کے حوالے سے وزیر اعظم نریندر مودی پر حملہ کرتے ہوئے کہا کہ ان کا نام بدل کر جی ایس ٹی رکھ دیا جانا چاہیے ۔ اویسی نے یہ بات گزشتہ رات ضلع جھنجھنو کے نول گڑھ قصبہ کے بکرا منڈی علاقے میں منعقدہ جلسہ عام میں کہی۔ انہوں نے کہا کہ ملک کے وزیر اعظم نے پنسل پر بھی جی ایس ٹی لگا دیا ہے ۔ یعنی اگر بچہ اسکول میں اے فار ایپل لکھتا ہے تو اسے پنسل پر جی ایس ٹی ادا کرنا ہوگا۔ شمشان گھاٹ پر بھی جی ایس ٹی لگایا گیا ہے ۔ اگر آپ زندہ رہے تو جی ایس ٹی اور مر گئے تو بھی جی ایس ٹی دینا ہی ہوگا۔ ایسے میں اب ملک کے وزیر اعظم کو اپنا نام جی ایس ٹی رکھ لینا چاہئے کیونکہ ہر چیز پر جی ایس ٹی لگا دیا گیا ہے ۔انہوں نے کہا کہ اب صرف سانس باقی ہے ۔ آنے والے وقت میں وزیر اعظم اور ان کی پارٹی کے لوگ کہیں گے کہ ہندوستان کو وشو گرو بنانا ہے ، اس لیے وہ سانس لینے پر بھی جی ایس ٹی لگانا چاہتے ہیں۔ انہوں نے کہا کہ بی جے پی کو شکست دینے کی ضرورت صرف مسلمانوں کی نہیں بلکہ 36 برادریوں کی ہے ۔
