حیدرآباد۔ پرانے شہر کے علاقہ گلزار حوض مچھلی کمان کے پاس آج دوپہر آتشزدگی کا واقعہ پیش آیا جس میں 2 دکانات بشمول ایک فٹ ویر شاپ جل کر خاکستر ہوگئے۔ تفصیلات کے مطابق آج دوپہر ایک بجے فائر کنٹرول روم کو ایک فون کال موصول ہوا جس میں بتایا گیا کہ مچھلی کمان سے متصل بعض دکانات میں اچانک آگ لگ گئی ہے ۔ اس بات کی اطلاع ملنے پر محکمہ فائر کے عہدیداروں نے گولی گوڑہ چمن اور شاہ عنایت گنج فائر اسٹیشن سے وابستہ دو فائر انجنوں کو جائے حادثہ پر روانہ کیا اور تقریباً دو گھنٹوں کی کوششوں کے بعد آگ پر قابو پالیا گیا۔ یہ حادثہ لاک ڈاؤن کے دوران پیش آنے کے نتیجہ میں 5 لاکھ روپئے سے زائد نقصانات کا تخمینہ کیا گیا ہے کیونکہ وہاں پر دکانات کے مالکین اور ملازمین موجود نہیں تھے۔ پولیس چارمینار کو شبہ ہے کہ آگ لگنے کی وجہ شارٹ سرکٹ بھی ہوسکتی ہے اور اس معاملہ کی تحقیقات کی جارہی ہیں۔
