ممبئی : بی جے پی قائد راہول نارویکر کو مہاراشٹرا اسمبلی کا آج اسپیکر منتخب کرلیا گیا ہے۔ اسی کے ساتھ ایکناتھ شنڈے حکومت اپنے پہلے امتحان میں پاس ہوگئی ہے۔ اسپیکر عہدہ کے الیکشن کو کل ہونے والے فلور ٹسٹ سے پہلے سیمی فائنل مانا جارہا ہے۔ پیر کو ایوان میں چیف منسٹر ایکناتھ شنڈے کو اکثریت ثابت کرنی ہے۔ اسمبلی اسپیکر عہدہ کیلئے ہوئے الیکشن میں بی جے پی لیڈر راہول نارویکر کو 164 ووٹ ملے جبکہ اپوزیشن کے امیدوار راجن سالوی کو 107 ووٹ ملے۔شیوسینا کے ادھو ٹھاکرے کی قیادت والے گروپ نے شنڈے خیمے کے 16 ممبران اسمبلی کو معطل کرنے کیلئے سپریم کورٹ کا رخ کیا ہے۔ اس صورت میں اکثریت کا ہندسہ 137 پر آجائے گا۔ 16 ووٹ کم ہونے پر ایکناتھ شنڈے۔ دیویندر فڈنویس حکومت کے پاس اکثریت کیلئے 148 ووٹ ہوں گے۔ حالانکہ سبھی 39 باغی ممبران اسمبلی کو نا اہل قرار دیا جاتا ہے تو بھی برسراقتدار اتحاد مطلوبہ تعداد سے آگے نکل جائے گی ۔ آج کی ووٹنگ سے پتہ چلتا ہے۔ 39 ممبران اسمبلی کی معطلی سے اکثریت کی تعداد 125 ہوجائے گی۔ راہول نارویکر کو 164 ووٹ ملے ، اس لئے 39 ووٹ کم ہونے پر بھی حکمراں اتحاد محفوظ رہے گا۔اس سے واضح ہے کہ ادھو ٹھاکرے کی قیادت والے گروپ کے پاس ایوان میں اکثریت حاصل کرنے کیلئے مطلوبہ تعداد نہیں ہے۔ حالانکہ آج سماج وادی پارٹی اور اے آئی ایم آئی ایم کے ممبران نے ووٹ نہیں ڈالا۔ بھلے ہی وہ صرف ووٹ دیں پھر بھی ادھو ٹھاکرے کے اتحاد کے پاس جیتنے کیلئے مطلوبہ ووٹ نہیں ہوں گے۔ اس طرح ایکناتھ شنڈے اور فڈنویس حکومت کو کل فلور ٹسٹ میں بھی آسانی سے کامیابی ملنے کی امید ہے ۔
