نیپیداؤ : میانمر میں فوجی دستوں کی جانب سے جمعہ کے روز مظاہرین پر فائرنگ کے واقعے کے باوجود ہفتے کو بھی بڑی احتجاجی ریلیاں نکالی گئیں۔ خبر رساں اداروں کے مطابق ینگون میں سیکورٹی فورسز نے گزشتہ روز ایک بار پھر احتجاج کرنے والوں پر گولیاں چلا دیں، جس کے نتیجے میں مزید 8 افراد ہلاک ہو گئے، جس کے بعد ملک میں آمریت کے خلاف جاری مظاہروں میں ہلاک ہونے والوں کی تعداد 238 ہو گئی ہے۔ ذرائع ابلاغ کے مطابق بغاوت کے بعد سے میانمر میں میڈیا کے خلاف بھی سخت کریک ڈاؤن جاری ہے، جس کے نتیجہ میں کئی چینل اور اخبارات بند کیے جا چکے ہیں۔ اسی سلسلے میں جمعہ کے روز برطانوی خبر رساں ادارے کے نمائندے سمیت 2 صحافیوں کو حراست میں لیا گیا جب کہ فوجی بغاوت اور مظاہرین کے خلاف طاقت کے وحشیانہ استعمال پر عالمی سطح کی تنقید کے باوجود ملک میں خونریز کریک ڈاؤن جاری ہے، جس میں دن بدن شدت آتی جا رہی ہے۔ مقامی ذرائع کے مطابق ینگون سمیت مختلف شہروں میں مظاہرین فورسز کی جانب سے تشدد کے باوجود پیچھے ہٹنے کو تیار نہیں اور دن رات مختلف علاقوں میں ریلیوں کی صورت میں سڑکوں پر نکل کر احتجاج کررہے ہیں۔