قاہرہ ۔ 14 اکٹوبر (ایجنسیز) امریکی صدر ڈونالڈ ٹرمپ نے اسرائیل فلسطین تنازعہ کے طویل المدتی حل کے بارے میں منگل کو کہا کہ وہ ایسا فیصلہ کریں گے جو میرے خیال میں درست ہو۔غزہ میں جنگ بندی کو مستحکم کرنے کے اعلامیہ پر دستخط کرنے کیلئے ٹرمپ نے پیر کو علاقائی رہنماؤں کے ہمراہ مشرق وسطیٰ کا ایک مختصر دورہ کیا۔انہوں نے نوٹ کیا کہ کئی لوگ یک ریاستی حل پسند کرتے ہیں جبکہ بعض کو دو ریاستی حل پسند ہے۔ ہمیں دیکھنا ہوگا۔ انہوں نے صدارتی طیارہ ایئر فورس ون میں سوار صحافیوں کو بتایا کہ میں فیصلہ کروں گا جو مجھے درست لگے لیکن میں دوسری ریاستوں اور دیگر ممالک کے ساتھ ہم آہنگی رکھوں گا۔اقوامِ متحدہ کے 193 رکن ممالک میں سے تقریباً تین چوتھائی فلسطینی ریاست کو تسلیم کرتے ہیں جس کا اعلان 1988 میں جلاوطن فلسطینی قیادت نے کیا تھا۔ گذشتہ ماہ برطانیہ اور کینیڈا سمیت اتحادیوں نے فلسطین کو بطور ریاست تسلیم کرنے کا فیصلہ کیا جس پر اسرائیل کے قریبی اتحادی امریکہ نے تنقید کی تھی۔
