نئی دہلی ۔ 19 ڈسمبر (ایجنسیز) بہار کے چیف منسٹر نتیش کمار کی جانب سے ایک مسلم خاتون ڈاکٹر کے نقاب کو کھینچنے کے واقعے پر آل انڈیا مسلم پرسنل لا بورڈ کے سینئر رکن اور معروف عالم مولانا سجاد نعمانی نے سخت بیان دیا ہے۔مولانا نعمانی نے چیف منسٹر نتیش کمار کو ذہنی مریض قرار دیا۔ انہوں نے جنتا دل یونائیٹڈ کے مسلم قائدین سے بھی اپیل کی کہ وہ نتیش کمار کو پارٹی سے باہر نکال دیں۔مولانا نے ویڈیو پیغام میں کہا کہ یہ اس ملک کی بدقسمتی ہیکہ جو لوگ ذہنی مریض ہیں، دماغی طور پر بیمار ہیں،انہیں ایک اہم ریاست کے چیف منسٹر کا منصب دے دیا گیا ہے۔ اگر طالبان اپنے ملک میں عورتوں کے لیے کسی لباس کو لازمی قرار دیتے ہیں تو آپ اور ہم اس کی مخالفت کرتے ہیں، لیکن ہمارے ملک میں ایک چیف منسٹر عورت کو اس کی مرضی کا لباس پہننے کی اجازت نہیں دیتا ہے۔