نئی دہلی، 14 مارچ (یو این آئی) ہندوستانی کرکٹر دپتی شرما نے کھیلوں میں نوجوان لڑکیوں کی زیادہ سے زیادہ حوصلہ افزائی اور تعاون کی اپیل کرتے ہوئے کہا ہے کہ خاتون کھلاڑیوں کی بڑھتی ہوئی مقبولیت ملک بھر میں لوگوں کی سوچ بدلنے میں مددگار ثابت ہو رہی ہے۔بی بی سی اور کلیکٹیو نیوز روم کی جانب سے کھیلوں میں خواتین کی شرکت سے متعلق رپورٹ کے اجراء کے موقع پر خطاب کرتے ہوئے دپتی شرما نے کہا کہ خاتون کھلاڑیوں کی کامیابیوں کو اجاگر کرنے والے اقدامات اگلی نسل کو ترغیب دینے میں اہم کردار ادا کرتے ہیں۔ انہوں نے کہا کہ اب تک کا سفر اچھا رہا ہے ۔ ہندوستان اور دنیا بھر میں بہت سی خواتین کو اس طرح کے اقدامات کے ذریعے حمایت مل رہی ہے ۔ یہ دیکھ کر خوشی ہوتی ہے کہ بہت سے ایوارڈ حاصل کرنے والوں کا تعلق ہندوستان سے ہے ۔ رپورٹ کے مطابق ہندوستان کی 14 ریاستوں میں خواتین کی کرکٹ میں شرکت 2020 کے مقابلے میں دوگنی ہو کر 10 فیصد ہو گئی ہے ۔ خاص طور پر 15 سے 24 سال کی عمر کی خواتین میں یہ شرح 6 فیصد سے بڑھ کر 16 فیصد تک پہنچ گئی ہے ۔ دسمبر 2025 سے جنوری 2026 کے درمیان 10,000 سے زائد افراد پر کیے گئے اس سروے سے یہ بات بھی سامنے آئی ہے کہ اب 26 فیصد نوجوان خواتین کھیلوں کو بطور کیریئر اپنانے پر غور کر رہی ہیں۔ دپتی شرما نے مزید کہا کہ ورلڈ کپ کے بعد ہر ایک کی سوچ میں بہت سی تبدیلیاں آئی ہیں۔ اب چاہے چھوٹی بچی ہو یا کوئی بڑی خاتون، بہت سے لوگ کرکٹر بننے یا کھیلوں میں حصہ لینے کا خواب دیکھتے ہیں۔ انہوں نے کہا کہ کھلاڑیوں کی بھی ذمہ داری ہے کہ وہ اگلی نسل کی حمایت اور رہنمائی کریں تاکہ انہیں کھیلوں میں بہتر مستقبل نظر آ سکے ۔ مطالعہ میں یہ بھی بتایا گیا ہے کہ خواتین کے کھیلوں کی ناظرین کی تعداد میں بھی اضافہ ہوا ہے اور 51 فیصد افراد نے گزشتہ چھ ماہ میں خواتین کے کھیلوں کی کوریج دیکھی ہے ۔ تاہم، رپورٹ میں سیکورٹی کے خدشات، وقت کی کمی اور دقیانوسی تصورات جیسی رکاوٹوں کا بھی ذکر کیا گیا ہے جنہیں دور کرنے کے لیے مسلسل کوششوں کی ضرورت ہے ۔ راجیہ سبھا کے رکن اور بی سی سی آئی کے نائب صدر راجیو شکلا نے اس تحقیق کو خواتین کھلاڑیوں کی شناخت اور حوصلہ افزائی کے لیے ایک مثبت قدم قرار دیا۔ انہوں نے کہا کہ میرے خیال میں یہ ایک شاندار اقدام اور بہت اچھی کوشش ہے ۔ بی بی سی نے ہمیشہ خواتین کھلاڑیوں کی حوصلہ افزائی کی ہے ، صرف کرکٹ میں ہی نہیں بلکہ مختلف کھیلوں میں بھی۔
