نئی دہلی : کانگریس قائد راہول گاندھی نے کہا ہے کہ ایک ملک اور ایک الیکشن کا نظریہ ہندوستان کی وفاقی روح کے خلاف ہے۔ مودی حکومت کی جانب سے ون نیشن، ون الیکشن کو نافذ کرنے سے متعلق قانونی پہلوؤں پر غور کرنے کیلئے سابق صدر رام ناتھ کووند کی سربراہی میں ایک کمیٹی تشکیل دی گئی ہے۔ کانگریس اس معاملہ پر مرکزی حکومت کو شدید تنقید کا نشانہ بنارہی ہے۔ قبل ازیں ادھیر رنجن چودھری نے کمیٹی کا حصہ بننے سے انکار کردیا جبکہ جئے رام رمیش نے اسے صرف ایک رسم قرار دیا اور اب راہول گاندھی نے کہا کہ یہ یونین آف انڈیا پر حملہ ہے۔راہول گاندھی نے ایک ملک، ایک انتخابات کے خیال کو یکسر مسترد کرتے ہوئے ایکس پر پیام دیا کہ ’انڈیا یعنی ہندوستان مختلف ریاستوں کا مرکز ہے۔ ایک ملک، ایک انتخاب کا تصور مرکز اور اس کی تمام ریاستوں پر حملہ کے مترادف ہے۔‘
