وزیراعظم نے الیکشن کمیشن کی تقرری کے عمل میں تبدیلی کی ہے
نئی دہلی، 10 ستمبر (یو این آئی) کانگریس نے کہا ہے کہ ’ووٹ چوری‘کو سوچی سمجھی سازش کے تحت آگے بڑھایا جا رہا ہے اور یہ کام بی جے پی حکومت کی سطح پر کیا جا رہا ہے ، جس کیلئے وزیر اعظم نریندر مودی اور وزیر داخلہ امیت شاہ ذمہ دار ہیں۔کانگریس کے بہار انچارج کرشنا الوارو، ریاستی کانگریس صدر راجیش رام اور اسمبلی میں اپوزیشن لیڈر شکیل احمد نے چہارشنبہ کو یہاں پارٹی ہیڈکوارٹر میں ایک مشترکہ پریس کانفرنس میں کہا کہ ان کے الزامات بے بنیاد نہیں، بلکہ حقائق پر مبنی ہیں۔انہوں نے کہا کہ سب سے پہلے مودی نے الیکشن کمیشن کی تقرری کے عمل میں تبدیلی کی ہے اور اس میں سپریم کورٹ کے چیف جسٹس کو ہٹا کر وزیر داخلہ کو رکھا گیا ہے ۔ دوسری بات قانون میں ایسی تبدیلیاں کی گئی ہیں تاکہ الیکشن کمیشن کے خلاف کوئی کارروائی نہ ہوسکے ۔ اس کے علاوہ ووٹر لسٹ رول میں کھیل کیا گیا ہے جس کی حقیقت پورے ملک کے سامنے رکھ دی گئی ہے ۔ انہوں نے یہ بھی الزام لگایا کہ بی جے پی الیکشن اور گنتی کے دن بھی گھپلہ کرتی ہے ۔ اس کی سب سے بڑی مثال وارانسی کا لوک سبھا الیکشن تھا، جس میں کانگریس کے امیدوار کئی راؤنڈ تک جیتتے ہیں، لیکن جب لائیو اپڈیٹ بند ہوجاتا ہے آخری وقت میں مودی کو فاتح قرار دے دیا جاتا ہے ۔کانگریس لیڈروں نے کہا، “ہم نے پارٹی لیڈر راہول گاندھی کی قیادت میں لوگوں کے حقوق کے تحفظ کیلئے ‘ووٹر ادھیکار یاترا’ نکالی، الیکشن کمیشن نے شناخت کیلئے 11 دستاویزات مانگے ہیں لیکن ان میں آدھار کارڈ شامل نہیں کیا گیا ہے ۔ ہم نے مسلسل مطالبہ کیا تھا کہ آدھار کارڈ کو بھی شناختی دستاویز کے طور پر ماننا چاہیے ۔ اب سپریم کورٹ نے بھی حکم دیا ہے کہ آدھار کو بھی شناختی دستاویز کے طور پر ماننا جائے ۔ یہ بھی عوام کی جیت ہے ، ان کے حقوق کی جیت ہے ۔ انہوں نے کہا کہ ووٹر لسٹ پر نظرثانی کے ذریعے ‘ووٹ چوری’ کا سلسلہ جاری ہے ۔ اس سے پہلے کانگریس بہار کے اہم مسائل – بھوک، بے روزگاری، نقل مکانی – کو مسلسل اٹھا رہی تھی اور ان مسائل پر ہماری مضبوط آواز کی وجہ سے ریاست اور مرکز کی موجودہ حکومت سمجھ چکی تھی کہ ریاست میں ان کی حالت خراب ہے ۔کانگریس لیڈروں نے کہا کہ ‘ووٹر ادھیکار یاترا’ نے لوگوں کو یہ پیغام دیا ہے کہ ‘ووٹ چوری’ ہو رہی ہے اور ان کے حقوق کے ساتھ چھیڑ چھاڑ کی جا رہی ہے ۔ اس یاترا سے لوگ اپنے حقوق کے تئیں بیدار ہوئے۔ ’ووٹر ادھیکار یاترا‘سے نکلنے والا نعرہ ۔ ووٹ چور، گدی چھوڑ۔ اب پورے ملک میں پھیل چکا ہے ۔