۔24فبروری کو احمدآباد آمد ، 25 فبروری کو نئی دہلی میں پروگرام
نئی دہلی، 13 فروری (سیاست ڈاٹ کام) امریکہ کے صدر ڈونلڈ ٹرمپ اور خاتون اول میلانیا ٹرمپ کے ہندوستان دورے میں انتخابی سیاست، کاروبار اور دفاعی تعاون یعنی تینوں کے جشن کی چاشنی ہو گی جو نہ صرف مہمانوں بلکہ ہم وطنوں کے لئے بھی انتہائی یادگار ہوگی۔صدر رام ناتھ کووند کی دعوت پر مسٹر ٹرمپ اور ان کی اہلیہ دو دن کے ہندوستان دورہ پر 24 فروری کو سب سے پہلے احمد آباد پہنچیں گے اور 25 تاریخ کو ان کے سرکاری پروگرام نئی دہلی میں ہوں گے ۔وزیر اعظم نریندر مودی احمد آباد میں مسٹر ٹرمپ کا استقبال کریں گے اور دونوں رہنما سردار ولبھ بھائی پٹیل بین الاقوامی ہوائی اڈے سے لے کر سابرمتی آشرم تک 10 کلومیٹر کے روڈ شو میں شامل ہوں گے ۔ اس کے لئے ہوائی اڈے سے سابرمتی آشرم تک راستہ کو سجایا جا رہا ہے ۔ سڑک کے دونوں جانب لاکھوں لوگ دنیا کی سب سے قدیم جمہوریت کے رہنما کا استقبال کریں گے ۔بعد میں دونوں رہنما نو تعمیر شدہ سردار پٹیل اسٹیڈیم میں ایک بہت بڑے جلسۂ عام ‘ کیم چھو ٹرمپ’ سے خطاب کریں گے ۔ یہ اسٹیڈیم دنیا کا سب سے بڑا اسٹیڈیم ہے جس میں بیک وقت ایک لاکھ10 ہزار افراد کے بیٹھنے کی گنجائش ہے ۔ ہوائی اڈے ، روڈ شو اور اسٹیڈیم میں ملک کی مختلف النوع ثقافت کی جھانکیاں بھی امریکی صدر کو متوجہ کریں گی۔ احمد آباد میں امریکی صدر کا مکمل پروگرام نمائشی رہے گا۔امریکہ میں اس سال کے آخر میں ہونے والے صدارتی انتخابات کے لحاظ سے احمد آباد میں روڈ شو اور جلسہ عام ‘ کیم چھو ٹرمپ’ بہت اہم ہو گا۔ امریکہ میں بڑی تعداد میں غیر مقیم ہندوستانی رہتے ہیں اور ان میں گجراتیوں کی تعداد کافی زیادہ ہے ۔ گزشتہ سال ستمبر میں ہیوسٹن میں وزیر اعظم مسٹر مودی کے ‘ ھاؤڈي مودی پروگرام’ میں حصہ لیا تھا۔ذرائع کے مطابق 25 فروری کو ٹرمپ نئی دہلی میں ہوں گے جہاں راشٹر پتی بھون کے صحن میں ان کا شاندار استقبال کیا جائے گا۔
وہ تینوں فوج کے سلامی گارڈ کا معائنہ کریں گے اور سلامی لیں گے ۔ پھر وہ راج گھاٹ پر مہاتما گاندھی کی سمادھی پر گلہائے عقیدت پیش کریں گے ۔ اس کے بعد حیدرآباد ہاؤس میں وزیر اعظم مسٹر مودی کے ساتھ وفد سطح کی دو سربراہی بات چیت ہوگی۔
