واشنگٹن،14 اپریل (سیاست ڈاٹ کام) صدر ڈونالڈ ٹرمپ کے ٹیکسز سے متعلق کیس کی سماعت سپریم کورٹ مئی میں ٹیلی کانفرنس کے ذریعے کرے گی۔غیر ملکی میڈیا کے مطابق امریکی سپریم کورٹ دلائل سنے گی کہ صدر ٹرمپ کانگریس اور نیو یارک کے پراسیکیوٹرز کے ذریعے اپنے ٹیکس گوشواروں کو بچانے کا سلسلہ جاری رکھ سکتے ہیں یا نہیں۔عدالت نے کہا کہ ٹیلی فونک کانفرنس کے ذریعے سماعت کا ایک مقصد نومبر میں ہونے والے صدارتی انتخاب سے پہلے فیصلہ سنانے کا موقع حاصل کرنا ہے جبکہ کورونا کے پیش نظر ججز اور وکلا کو سماجی دوری کے ساتھ کیس میں شرکت کرنے کا موقع ملے گا۔ڈونالڈ ٹرمپ کا کیس سننے والے بنچ میں شامل دو ججوں کی عمریں 80 سال اور ایک کی عمر 65 برس سے زیادہ ہے ، انہیں کورونا سے متاثر ہونے کا خطرہ زیادہ ہے ۔ امریکی عدالت کے مطابق 10 مقدمات میں زبانی دلائل 4 سے 6 مئی اور 11 سے 13 مئی کو ہوں گے ۔
