جڑچرلہ میونسپلٹی حدود میں مختلف ترقیاتی پروگرام سے ریاستی وزیر کے ٹی آر کا خطاب
محبوب نگر۔ شہروں اور دیہاتوں کی منصوبہ بند ترقی سے ہی مجموعی طور پر ریاست کی ترقی ہوسکتی ہے۔ ان خیالات کا اظہار ریاستی وزیر کے ٹی راما راؤ نے آج ضلع کے جڑچرلہ میونسپلٹی کے حدود میں کئی ایک ترقیاتی کاموں کا سنگ بنیاد رکھا اورتکمیل شدہ کاموں کا افتتاح بھی کیا۔ جڑچرلہ کے کاورم پیٹ ، گنگا پور میں بی ٹی روڈ جو 4 کروڑ 20لاکھ کے صرفہ سے تعمیر کی گئی اس کا افتتاح کیا۔ 2 کروڑ 10 لاکھ کے صرفہ سے مشن بھگیرتا انٹرا ولیج اسکیم کا افتتاح کیا۔ 3 کروڑ 98 لاکھ کے صرفہ سے تعمیر شدہ منی ٹینک بنڈ اور تالاب کے مرمتی کاموں کا افتتاح کیا۔ اس کے علاوہ جڑچرلہ میں 15 کروڑ کی لاگت سے تعمیر ہونے والی انڈر ڈرین کا سنگ بنیاد رکھا۔ انہوں نے مارکٹ یارڈ میں جلسہ کو مخاطب کرتے ہوئے کہا کہ پہلے جڑچرلہ، کاورم پیٹ، بادے پلی کیا تھا لیکن ٹی آر ایس حکومت نے ترقیاتی کاموں سے اس کی شکل بدل ڈالی ہے۔ انہوں نے مزید کہا کہ 200 روپئے کے پنشن کو 2000 کرتے ہوئے حکومت 40 لاکھ مستحقین میں پنشن تقسیم کررہی ہے۔انہوں نے اعلان کیا کہ بہت جلد نئے راشن کارڈز اور نئے پنشن بھی جاری ہوں گے۔ آج 24 گھنٹے برقی سربراہ کی جارہی ہے۔ 18 لاکھ طلباء کو پوسٹ میٹرک اسکالر شپس اور فیس ری ایمبرسمنٹ کیلئے 12800 کروڑ روپئے ڈگری و انجینئرنگ طلباء کیلئے جاری کئے جارہے ہیں۔ حاملہ خواتین کو سرکاری دواخانوں میں زچگی کروانے پر کے سی آر کٹ کے علاوہ 13 ہزار نقد دیئے جارہے ہیں جس سے سرکاری دواخانوں میں زچگیوں کے رجحان میں اضافہ دیکھا جارہا ہے۔ جڑچرلہ ٹاؤن میں 1500 ڈبل بیڈرومس کی تعمیر آخری مرحلہ میں ہے۔ ضرورت پر مزید ڈبل بیڈ رومس تیار کریں گے۔ ریاستی وزیر وی سرینواس گوڑ نے کہا کہ جڑچرلہ ٹاؤن میں سڑک کی توسیع کیلئے کئی اہم ترقیاتی کام انجام دیئے گئے۔ انہوں نے انکشاف کیا کہ مستقبل میں محبوب نگر، جڑچرلہ اور بھوت پور کو ملا کر مہانگر کی تشکیل کا منصوبہ ہے۔ جلسہ سے رکن پارلیمنٹ محبوب نگر سرینواس ریڈی نے بھی مخاطب کیا۔ رکن اسمبلی جڑچرلہ لکشما ریڈی نے جلسہ کی صدارت کی۔ انہوں نے کہا کہ پینے کے پانی کی کافی تکلیف تھی لیکن مشن بھگیرتا کے ذریعہ اس کو حل کرلیا گیا ہے۔ جڑچرلہ کے اطراف 20 پارکس اور ٹینک بنڈ کی تعمیر کا منصوبہ ہے۔ اس موقع پر ضلع پریشد چیرمین سورنا سدھاکر ریڈی، ضلع کلکٹر وینکٹ راؤ، ایم ایل ایز آلا وینکٹیشور ریڈی، سی رام موہن ریڈی، راجندر ریڈی، ڈی سی سی بی چیرمین نظام پاشاہ، شیوا کمار اور دیگر موجود تھے۔ قبل ازیں کے ٹی آر اور سرینواس گوڑ نے جڑچرلہ چوراہا پر امبیڈکر کے مجسمہ پر پھول مالا چڑھاکر خراج پیش کیا۔