جے پور:راجستھان میں پنجاب جیسی شکست سے بچنے کے لیے کانگریس قیادت سینئر لیڈر اور مدھیہ پردیش کے سابق وزیر اعلیٰ کمل ناتھ کی ثالثی کے ذریعے اشوک گہلوت اور سچن پائلٹ کے درمیان تنازع کو ختم کرنے کی امید کر رہی ہے۔ ذرائع نے این ڈی ٹی وی کو بتایا کہ کمل ناتھ نے جمعرات کو دہلی میں پائلٹ اور پارٹی کے جنرل سکریٹری کے سی وینوگوپال سے ملاقات کی اور دونوں دھڑوں کے درمیان اختلافات کو دور کرنے کے طریقوں پر تبادلہ خیال کیا۔کمل ناتھ پہلے بھی سچن پائلٹ سے بات کر چکے ہیں۔ بتایا جاتا ہے کہ کانگریس ہائی کمان کی جانب سے ڈسپلن سے متعلق کارروائی کچھ دنوں کے لیے ملتوی کر دی گئی ہے۔ کانگریس صدر فی الحال باہر ہیں۔ ذرائع کے مطابق کمل ناتھ نے کانگریس صدر تک اپنی بات پہنچائی ہے۔ گاندھی خاندان کے مشورے کے بغیر اس معاملے میں کوئی فیصلہ نہیں کیا جائے گا۔ سچن پائلٹ نے بھی کانگریس لیڈروں کے سامنے اپنی بات رکھی ہے۔
