پونم پربھاکر نے باغ لنگم پلی میں کینٹین کا افتتاح کیا، شہر کے دیگر علاقوں میں مزید مراکز کا قیام
حیدرآباد ۔ 28۔نومبر (سیاست نیوز) حیدرآباد کے انچارج وزیر پونم پربھاکر نے آج باغ لنگم پلی سندریا پارک کے قریب اندراماں کینٹین کا افتتاح کیا۔ اندراماں کینٹین کے ذریعہ محض 5 روپئے میں ناشتہ اور لنچ سربراہ کیا جارہا ہے ۔ میئر گریٹر حیدرآباد جی وجیہ لکشمی ، رکن راجیہ سبھا انیل کمار یادو ، ڈپٹی میئر سری لتا شوبھن ریڈی ، رکن اسمبلی مشیر آباد ایم گوپال اور کارپوریٹر روی چاری کے علاوہ اعلیٰ عہدیدار موجود تھے ۔ پونم پربھاکر نے دیگر قائدین کے ساتھ اندراماں کینٹین کا ناشتہ کیا۔ اس موقع پر انہوں نے کہا کہ کانگریس کی عوامی حکومت نے حیدرآباد میں رعایتی قیمت پر ناشتہ اور لنچ فراہم کرنے کیلئے اندراماں کینٹین کا قیام عمل لایا ہے۔ صبح اور دوپہر کے وقت ملازمت پر جانے والے افراد اور محنت مزدوری کرنے والے ورکرس اس سہولت سے استفادہ کرسکتے ہیں۔ انہوں نے کہا کہ محض 5 روپئے میں صاف ستھرا ناشتہ اور لنچ فراہم کیا جارہا ہے اور عوام اس سہولت سے استفادہ کر رہے ہیں۔ انہوں نے کہا کہ مہنگائی کے اس دور میں اندراماں کینٹین غریب اور متوسط طبقات کے لئے کسی نعمت سے کم نہیں ہے ۔ شہر کے دیگر علاقوں میں مزید کاؤنٹرس قائم کئے جائیں گے۔ انہوں نے کہا کہ گریٹر حیدرآباد میونسپل کارپوریشن کی جانب سے مقامات کی نشاندہی کرتے ہوئے مراکز قائم کئے جائیں گے ۔ انہوں نے کہا کہ کانگریس حکومت نے عوام کی بھلائی سے متعلق اپنے وعدے کی تکمیل کی ہے۔ میئر حیدرآباد وجیہ لکشمی نے عوام سے اپیل کی کہ وہ اندراماں کینٹین کی سہولت سے استفادہ کریں۔ رکن اسمبلی ایم گوپال نے اندراماں کینٹین کے قیام پر حکومت کی ستائش کی اور غریب آبادیوں میں مزید مراکز کے قیام کا مشورہ دیا ۔1
