lہندوستان کی جانب سے سندھ آبی معاہدہ معطل کرنے پر جوابی کارروائی
lشملہ معاہدہ پر بھی روک ‘ واگھا بارڈر بند ‘ ایئر اسپیس ہندوستان کیلئے بندکر دیاگیا
lپاکستان میں موجود ہندوستانی شہریوں کو ملک چھوڑنے کی ہدایت ‘سیاسی کشیدگی میں اضافہ کا اندیشہ
اسلام آباد:پہلگام میں ہوئے دہشت گردانہ حملہ کے بعد ہندوستان نے پاکستان کے خلاف جو بڑے اقدام اٹھائے ہیں، اس سے ناراض پاکستان نے 24 اپریل کو جوابی کارروائی کی ہے۔ پاکستانی وزیر اعظم شہباز شریف کی قیادت میں آج این ایس سی کی میٹنگ ہوئی۔ اس میں پہلگام حملہ کے بعد پیدا حالات پر تبادلہ خیال ہوا اور ساتھ ہی ہندوستان کیلئے ہوائی راستہ بند کرنے سمیت کچھ بڑے فیصلے لیے گئے۔میڈیا رپورٹ میں بتایا گیا ہے کہ این ایس سی کی میٹنگ میں پاکستان نے ہندوستان کی جانب سے سندھ آبی معاہدہ معطل کیے جانے کی سخت الفاظ میں مذمت کی ہے۔ پاکستان کا کہنا ہے کہ اگر ہندوستان نے پانی پر روک لگائی تو اسے ’جنگ‘ تصور کیا جائے گا۔ ساتھ ہی یہ بھی جانکاری دی گئی ہے کہ پاکستان نے اپنا ایئر اسپیس ہندوستان کیلئے بند کر دیا ہے۔ یعنی اب کوئی بھی ہندوستانی طیارہ پاکستان کے ہوائی راستہ کا استعمال نہیں کر پائے گا۔پاکستان نے این ایس سی کی میٹنگ میں جو اہم فیصلے لیے ہیں اس میں ہندوستان کے ساتھ تمام دو فریقی معاہدے فوری اثر سے روکنے کا اعلان بھی شامل ہے۔ پاکستان نے شملہ معاہدہ پر بھی روک لگا دی ہے اور واگھہ بارڈر بھی بند کر دیا ہے۔ اتنا ہی نہیں، پاکستان میں موجود ہندوستانی شہریوں کو ملک چھوڑنے کی ہدایت بھی دی گئی ہے۔ انھیں ملک چھوڑنے کیلئے 48 گھنٹے کا وقت دیا گیا ہے۔ پاکستان میں ہندوستانی سفیروں کی تعداد بھی گھٹا کر 30 کر دی گئی ہے۔ ساتھ ہی پاکستان میں موجود ہندوستانی دفاع، بحریہ اور فضائیہ سے جڑے اہلکاروں کو ہدایت دی گئی ہے کہ وہ 30 اپریل تک ملک چھوڑ دیں۔ہندوستان کی جانب سے سندھ آبی معاہدہ معطل کرنے کے فیصلہ پر پاکستان نے اپنی سخت ناراضگی ظاہر کی ہے۔ ہندوستان کے اس فیصلے کو خارج کرتے ہوئے پاکستان نے کہا کہ یہ آبی معاہدہ 24 کروڑ پاکستانیوں کے لیے لائف لائن ہے۔ پاکستان نے ہندوستان پر بین الاقوامی قوانین کی خلاف ورزی کا الزام بھی عائد کیا۔ ہندوستان کی کارروائی سے خوفزدہ پاکستان نے پہلگام حملہ میں اس کا کوئی ہاتھ نہ ہونے کی بات بھی سامنے رکھی ہے۔ پاکستانی وزیر اعظم دفتر کی جانب سے جاری بیان میں کہا گیا ہے کہ ہندوستان کا فیصلہ سیاسی کشیدگی کو بڑھائے گا اور علاقہ میں امن قائم کرنے میں رخنہ انداز ہوگا۔ ساتھ ہی پاکستان نے کہا کہ وہ دہشت گردی کی واضح الفاظ میں مذمت کرتا ہے۔
ہندوستانی ناظم الامورکی دفتر خارجہ طلبی
جوابی فیصلوں سے تحریری طور پر آگاہ کردیا گیا
اسلام آباد: دفتر خارجہ نے ہندوستانی ہائی کمیشن کے ناظم الامور گیتکا سری واستو کو طلب کرکے ہندوستانی اقدامات پر شدید احتجاج کیا اور ہائی کمیشن میں موجود ناپسندیدہ شخصیات کی فہرست تھمادی۔ذرائع کے مطابق پاکستان کی جانب سے ہندوستانی ہائی کمیشن میں ہندوستانی بری، بحری اور فضائی اتاشیوں کو ناپسندیدہ قرار دیا گیا ہے۔ ہندوستان کے بری، بحری اور فضائی اتاشیوں کو فوری طور پر ملک چھوڑنے کا حکم دیا گیا ہے۔ذرائع کے مطابق ہندوستان کے فوجی اتاشیوں کے ساتھ ان کے عملے کو بھی ملک چھوڑنے کا حکم دیا گیا ہے۔ پاکستان نے ہندوستان کو اپنے جوابی فیصلوں سے تحریری پر آگاہ کردیا۔ اسی طرح پاکستان اور ہندوستان کے درمیان تجارت بشمول بالواسطہ تجارت کی معطلی کے فیصلے سے بھی آگاہ کیا گیا۔جموں وکشمیر کے علاقہ پہلگام میں دہشت گرد حملہ کے بعد ہندوستان اور پاکستان کے درمیان تعلقات میں مزید بگاڑ آگیا ہے۔ حملہ میں پاکستان کے دہشت گردوں کے ملوث ہونے کا الزام عائدکیا گیا ہے۔