آج سے فہرست رائے دہندگان پر نظرثانی، ڈسمبر کے دوسرے ہفتہ میں شیڈول کی اجرائی
حیدرآباد۔ 19 نومبر (سیاست نیوز) اسٹیٹ الیکشن کمیشن نے پنچایت راج اداروں کے انتخابات کی تیاریوں کا آغاز کردیا ہے۔ الیکشن کمیشن نے پنچایت راج اداروں کی فہرست رائے دہندگان پر نظرثانی کا شیڈول جاری کیا ہے۔ کل 20 نومبر سے 23 نومبر تک پنچایتوں میں فہرست رائے دہندگان پر نظرثانی کی جائے گی۔ 20 نومبر کو رائے دہندوں اور عوام سے درخواستیں اور اعتراضات قبول کئے جائیں گے اور 21 نومبر کو ان کی یکسوئی ہوگی۔ 23 نومبر کو پولنگ اسٹیشنوں پر عبوری فہرست رائے دہندگان آویزاں کی جائے گی۔ ڈسٹرکٹ الیکشن آفیسرس کو فہرست رائے دہندگان پر نظرثانی کے سلسلہ میں اسٹیٹ الیشکن کمشنر رانی کمودنی نے احکامات جاری کئے ہیں۔ انہوں نے کہا کہ نقائص سے پاک فہرست رائے دہندگان تیار کی جائے تاکہ تمام اہل رائے دہندوں کو ووٹ دینے کا موقع ملے۔ واضح رہے کہ تلنگانہ حکومت نے پہلے مرحلہ میں پنچایت راج اداروں کے چناؤ منعقد کرنے کا فیصلہ کیا ہے۔ بتایا جاتا ہے کہ ڈسمبر کے دوسرے ہفتہ میں پنچایت راج چناؤ کا شیڈول جاری کردیا جائے گا۔ ڈسمبر کے اواخر تک انتخابی مرحلہ مکمل کرلیا جائے گا۔ یکم تا 9 ڈسمبر حکومت کے دو سال کی تکمیل کے سلسلہ میں پرجاپالنا تقاریب کا انعقاد عمل میں آئے گا جس کے بعد پنچایت چناؤ کی رائے دہی کی تاریخ طے کی جائے گی۔ تلنگانہ کابینہ نے 42 فیصد بی سی تحفظات پر قانونی کشاکش کے پیش نظر پارٹی کی سطح پر ٹکٹوں کی تقسیم میں بی سی طبقات کو 42 فیصد نمائندگی کا فیصلہ کیا ہے۔ اس مسئلہ پر 24 نومبر کو ہائی کورٹ میں سماعت ہوگی۔ 31 مارچ تک پنچایت راج چناؤ کا مرحلہ مکمل کرنے پر مرکزی حکومت سے 3000 کروڑ کی گرانٹ حاصل ہوسکتی ہے۔ 1