کراچی ۔19مارچ (سیاست ڈاٹ کام) پاکستان کرکٹ بورڈ (پی سی بی) نے پاکستان سوپر لیگ (پی ایس ایل) سے منسلک تمام 128 افراد کے کورونا ٹسٹ منفی آنے کی تصدیق کردی۔ اس حوالے سے جاری ایک بیان میں کہا گیا پی ایس ایل 2020 میں شریک جملہ 128 کھلاڑیوں، اسپورٹس عملہ، میچ عہدیدار، براڈکاسٹرز اور ٹیم مالکان کے کورونا ٹسٹ کیے گئے۔ پی سی بی کی جانب سے احساس ذمہ داری کے تحت ان ٹسٹ کا انعقاد کیا گیا، جس میں تمام 128 افراد کے نتائج منفی آئے ہیں۔بیان کے مطابق اس تمام معاملے پر پی سی بی کے چیف ایگزیکٹو وسیم خان نے کہا کہ پاکستان کرکٹ بورڈ اور پی ایس ایل کی ساکھ کے لئے ضروری تھا کہ ایونٹ کے اختتامی مرحلے تک شرکت کرنے والے تمام افرادکے نتائج منفی آئے۔انہوں نے کہا کہ تمام کھلاڑی اوردیگر افراد محفوظ اور تندرست ہیں جبکہ پی سی بی اپنے تمام ملازمین کے تحفظ کیلیے بھی احتیاطی تدابیر پر عمل کرتا رہے گا۔ ہمیں مصافحہ کرنے یا گلے ملنے سے پرہیزکرنا ہوگا جبکہ اجتماعات سے دور رہنے اور کھانسنے یا چھینکنے والے افراد سے قریبی رابطے سے گریزکرنا چاہیے۔خیال رہے کہ پاکستان میں کورونا وائرس کے خطرات میں اضافے کے پیش نظر 2 روز قبل پاکستان سوپر لیگ (پی ایس ایل) سیزن 5 کو ملتوی کردیا گیا۔
