تمام 119 اسمبلی حلقہ جات میں 16 جولائی کو اہتمام
حیدرآباد۔/11 جولائی، ( سیاست نیوز) بی جے پی نے تلنگانہ میں عوامی رابطہ کی مہم کے تحت ’ چائے پر چرچا‘ کے بجائے ’ٹفن بیٹھک‘ کے پروگرام کے اہتمام کا فیصلہ کیا ہے۔ وزیر اعظم نریندر مودی نے چائے پر چرچا پروگرام کا آغاز کیا تھا جس کے تحت پارٹی کارکن اور قائدین گروپ کی شکل میں بات چیت کرتے ہیں اور پارٹی کے استحکام کی حکمت عملی تیار کی جاتی ہے۔ اس پروگرام کی عدم مقبولیت کے نتیجہ میں پارٹی نے تلنگانہ میں ’ ٹفن بیٹھک ‘ پروگرام کا فیصلہ کیا ہے۔ اس مہم کا پہلا پروگرام 16جولائی کو ریاست بھر میں منایا جائے گا۔ تمام 119 حلقہ جات میں پارٹی قائدین مقامی ورکرس کے ساتھ ’ ٹفن بیٹھک‘ میں انتخابی حکمت عملی اور الیکشن کی تیاریوں کا جائزہ لیں گے۔ اس پروگرام میں حصہ لینے والوں کیلئے لازمی قرار دیا گیا ہے کہ وہ اپنا ٹفن ساتھ لائیں اور یہ پروگرام کسی ایک چوراہے پر منعقد کیا جائے۔ اس پروگرام میں کم سے کم 200 قائدین اور کارکنوں کی شرکت کو یقینی بنایا جائے گا۔ر
