کراچی ۔ پاکستان کرکٹ بورڈ نے اگلے سال پاکستان میں ہونے والی چمپئنز ٹرافی کا شیڈول حتمی منظوری کے لیے آئی سی سی کو بھیج دیا ہے۔ تفصیلات کے مطابق ٹورنمنٹ 19 فروری سے 9 مارچ تک کراچی، لاہور اور راولپنڈی میں منعقد ہو گا، ہندوستانی ٹیم اپنے تمام میچ قذافی اسٹیڈیم لاہور میں کھیلے گی۔ فائنل سمیت7 میچز لاہور میں ہوں گے جبکہ کراچی کا نیشنل اسٹیڈیم افتتاحی میچ اور ایک سیمی فائنل کی میزبانی کرے گا، کراچی میں مجموعی طور پر3 میچز ہوں گے۔ پنڈی ایک سیمی فائنل سمیت 5 میچوں کی میزبانی کرے گا۔ایونٹ میں مجموعی طور پر 15میچز کھیلے جائیں گے۔ ذرائع کے مطابق قذافی اسٹیڈیم میں پی سی بی ہیڈ کوارٹر کی جگہ جدید کارپوریٹ باکسسز بنائے جائیں گے، پوری عمارت کو نہیں گرایا جائے گا، ڈریسنگ روم حال ہی میں بنے ہیں وہ اپنی جگہ موجود ہوں گے۔ فضل محمود اور عمران خان انکلوژر میں شائیقین کی گنجائش بڑھائی جائے گی اور موجودہ انکلوژر کے پیچھے سے انکلوژر کو مزید اونچا کیا جائے گا۔ لاہور، کراچی اور پنڈی اسٹیڈیم میں نئی ڈیجیٹل اسکرین نصب کی جائیں گی۔ ہندوستان کیلئے لاہور منتخب کیا گیا جہاں ہندوستانی ٹیم اپنے تمام مقابلے کھیل سکتی ہے ۔
