نئی دہلی: وزارت خارجہ نے سنٹرل انفارمیشن کمیشن کو بتایا کہ مرکز نے 2020 میں سابق امریکی صدر ڈونالڈ ٹرمپ کے 36 گھنٹے کے سرکاری دورے کے لیے رہائش، خوراک اور دیگر انتظامات پر تقریباً 38 لاکھ روپے خرچ کیے ہیں۔ ٹرمپ 24-25 فروری 2020 کو ہندوستان کے اپنے پہلے دورے پر آئے تھے۔ انہوں نے اپنی اہلیہ میلانیا، بیٹی ایوانکا، داماد جیرڈ کشنر اور کئی اعلیٰ حکام کے ساتھ احمد آباد، آگرہ اور نئی دہلی کا دورہ کیا۔ ٹرمپ نے 24 فروری کو احمد آباد میں تین گھنٹے گزارے۔ اس دوران انہوں نے 22 کلومیٹر طویل روڈ شو میں حصہ لیا، سابرمتی آشرم میں مہاتما گاندھی کو خراج عقیدت پیش کیا اور نئے تعمیر شدہ موتیرا کرکٹ اسٹیڈیم میں وزیر اعظم نریندر مودی کے ساتھ ایک بہت بڑے اجتماع ‘نمستے ٹرمپ’ سے خطاب کیا۔ اس کے بعد وہ اسی دن تاج محل دیکھنے آگرہ روانہ ہوئے۔ وہ 25 فروری کو وزیر اعظم مودی کے ساتھ دو طرفہ بات چیت کے لیے دہلی آئے تھے۔
