سورت : دہلی کے نائب وزیر اعلی اور عام آدمی پارٹی کے لیڈر منیش سسودیا آج گجرات میں سورت کے دورے پر ہیں اوراس دوران وہ مقامی آپ لیڈروں اورمیونسپل کارپوریشن میں آپ پارٹی کے وارڈ کونسلرزسے میٹنگ کریں گے ۔ معلوم ہوا ہے کہ اگلے سال گجرات میں ہونے والے اسمبلی انتخابات میں آپ نے تمام 182 سیٹوں پر امیدوار کھڑے کرنے کا اعلان کیا ہے ۔ اس سال کے اوائل میں ہوئے مقامی انتخابات میں بی جے پی کا گڑھ مانے جانے والے سورت میں آپ نے غیر معمولی کارکردگی کا مظاہرہ کر کے دو درجن سے زیادہ میونسپل کارپوریشن کی سیٹوں پر قبضہ کرلیا تھا ۔ اس سے حوصلہ افزا ہو کر پارٹی صدر اور دہلی کے وزیر اعلی اروند کیجریوال نے یہاں روڈ شو منعقد کیا تھا اور حال ہی میں ایک بار پر گجرات کا دورہ کیا تھا ۔ مسٹر سسودیا آج صبح ہوائی اڈے پر پہنچے ۔ پارٹی کے ریاستی صدر گوپال اٹالیا سمیت پارٹی کے دیگر لیڈروں نے الزام لگایا کہ پولیس نے انہیں وہاں سے کافی دور ہی روک دیا اور یہاں تک کہ مناسب طریقے سے انہیں اپنے لیڈرکا استقبال تک نہیں کرنے دیا ۔ مسٹر اٹالیا نے اسے ریاستی بی جے پی حکومت کی آمریت قرار دیا۔ بعد میں مسٹر سیسودیا سرکٹ ہاؤس پہنچ گئے اور میونسپل کارپوریشن میں حزب اختلاف کے لیڈر بھنڈری اور دیگر لیڈروں سے بات چیت کی ۔ پارٹی ذرائع نے بتایا کہ وہ شہر کے نان پورہ علاقے میں مقامی لیڈروں اور صنعتی دنیا کے لوگوں سے ملاقات کریں گے اور ان میں سے بہت سے لوگ آپ میں شامل بھی ہوں گے ۔
