نئی دہلی: راجیہ سبھا کے چیئرمین جگدیپ دھنکڑ نے منگل کو کہا کہ ایوان میں ترنمول کانگریس کے ڈیرک اوبرائن کے نامناسب برتاؤ پر ابھی تک کوئی فیصلہ نہیں کیا گیا ہے ۔وقفہ صفر کے دوران برائن کے ایوان میں نامناسب طرز عمل پر دھنکڑ نے انہیں مانسون سیشن کی بقیہ مدت کے لیے کارروائی سے معطل کرنے کا اعلان کیا تھا۔ قبل ازیں، قائد ایوان مسٹرپیوش گوئل نے مانسون سیشن کے بقیہ وقت کے لیے برائن کو معطل کرنے کی تحریک پیش کی تھی۔وقفہ سوال کے آغاز پر دھنکڑ نے کہا کہ انہوں نے برائن کی معطلی کا اعلان کرنے پر غور کیا ہے ۔ اس لیے وہ اعلان کے بعد بھی ایوان میں موجود ہیں۔کانگریس کے پرمود تیواری نے کہا کہ چیئرمین کو بڑا دل دکھانا چاہئے اور برائن کی معطلی واپس لینی چاہئے ۔ کانگریس کے ہی مکل واسنک نے کہا کہ حالات کی وجہ سے برائن مشتعل ہو گئے ۔ ان کا مقصد چیئرمین کی توہین کرنا نہیں ہے ۔ اسی پارٹی کے دگ وجے سنگھ نے بھی برائن کے حق میں بات کی۔ کانگریس کے جے رام رمیش نے کہا کہ برائن کا طرز عمل مناسب نہیں ہے ۔ وہ ان کی طرف سے افسوس کا اظہار کرتے ہیں۔قائد ایوان پیوش گوئل نے کہا کہ برائن کا طرز عمل ضوابط کے مطابق نہیں تھا۔ انہوں نے چیئرمین کی توہین کرنے کی کوشش کی ہے ۔ لیکن اس تعطل سے نکلنے کا راستہ تلاش کرنا ہوگا۔ وہ چیئرمین سے قائد ایوان کی حیثیت سے اظہار افسوس کرتے ہیں۔ انہوں نے کہا کہ اگر برائن کواپنے طرز عمل پر افسوس ہے تو اسے قبول کرلینا چاہیے ۔ اس پر کانگریس ارکان نے ایک بار پھر ہنگامہ شروع کردیا۔ اس کے بعد دھنکڑ نے کہا کہ ارکان کو ایوان کی کارروائی چلنے دینا چاہیے کیونکہ برائن کے معاملے پر ابھی کوئی فیصلہ نہیں ہوا ہے ۔
