مدھیہ پردیش کانگریس انچارج ہریش چودھری، صدر جیتوپٹواری اور سابق وزیراعلیٰ ڈگ وجے سنگھ کی مشترکہ پریس کانفرنس
بھوپال، 17 جون (یو این آئی) مدھیہ پردیش کانگریس گوالیار ہائی کورٹ کے احاطے میں ڈاکٹر بھیم راؤ امبیڈکر کے مجسمے کی تنصیب کے معاملے پر عوامی بیداری مہم چلائے گی۔ریاستی کانگریس کے انچارج ہریش چودھری، ریاستی صدر جیتو پٹواری، اپوزیشن لیڈر امنگ سنگھار اور سابق وزیر اعلیٰ ڈگ وجئے سنگھ نے آج ریاستی کانگریس دفتر میں منعقدہ مشترکہ پریس کانفرنس میں نامہ نگاروں کو یہ بات بتائی۔ریاستی کانگریس کے انچارج چودھری نے الزام لگایا کہ گوالیار ہائی کورٹ کے احاطے میں ڈاکٹر امبیڈکر کے مجسمے کی تنصیب پر تنازعہ کھڑا کرنا افسوسناک ہے ۔ ایک سوچی سمجھی سازش کے تحت آئین کے معمار کی خدمات پر سوالات اٹھائے جا رہے ہیں۔ کانگریس اس معاملے پر عوام کے درمیان مضبوطی سے اپنی بات رکھے گی اور بابا صاحب کی وقار کی حفاظت کرے گی۔ریاستی صدر پٹواری نے الزام لگایا کہ بی جے پی اور راشٹریہ سویم سیوک سنگھ ڈاکٹر امبیڈکر کی توہین کرنے کی سازش کررہے ہیں۔ گوالیار میں پوسٹروں کے ذریعے یہ پروپیگنڈہ کیا جا رہا ہے کہ بابا صاحب آئین کے معمار نہیں تھے ۔ کانگریس ڈاکٹر امبیڈکر اور آئین کے احترام میں ایک وسیع عوامی بیداری مہم چلائے گی۔انہوں نے کہا کہ 23 جون کو گھر گھر عوامی آگاہی کا اہتمام کیا جائے گا، 24 جون کو کچی آبادیوں میں آئین پر بحث اور دعوت کا اہتمام کیا جائے گا۔ اس کے بعد 25 جون کو تمام سینئر لیڈر گوالیار میں انشن پر بیٹھیں گے ۔اسمبلی میں اپوزیشن لیڈر سنگھار نے کہا کہ بی جے پی اور سنگھ ملک کی تاریخ کو بدلنے اور طبقاتی جدوجہد کو فروغ دینے کی کوشش کر رہے ہیں۔ ڈاکٹر امبیڈکر کو اس لیے نشانہ بنایا جا رہا ہے کہ وہ دلت طبقے سے تعلق رکھتے تھے ۔سابق وزیر اعلیٰ ڈگ وجے سنگھ نے الزام لگایا کہ آر ایس ایس نے آئین کو جلایا اور ترنگے کی مخالفت کی، اب وہ ڈاکٹر امبیڈکر کے مجسمے اور ان کے تعاون کی مخالفت کر رہی ہے ۔ اس معاملے میں بی جے پی کی خاموشی اور دوہرا کردار واضح ہے ۔