نئی دہلی : کانگریس لیڈر نوجوت سنگھ سدھو کے ساتھ طویل عرصہ سے جاری اختلافات کے بعد آخرکار پنجاب کے وزیر اعلی کیپٹن امریندر سنگھ نے اپنے عہدہ سے استعفیٰ دیدیا۔ کیپٹن امریندر سنگھ کے اس فیصلہ کے بعد کانگریس میں ہلچل مچ گئی ہے۔ اسی درمیان نیشنل کانفرنس کے نائب صدر اور جموں و کشمیر کے سابق چیف منسٹر عمر عبداللہ نے بھی پنجاب میں وزیر اعلی امریندر سنگھ کے استعفیٰ کو لے کر کانگریس کے اندرونی اختلافات پر طنز کیاہے۔ عمر عبداللہ نے ایک ٹویٹ کیا ، جس میں انہوں نے کانگریس کی بی جے پی سے لڑنے کی صلاحیت پر بھی سوال کھڑا کیا۔ عمر عبداللہ نے اپنے ٹویٹ میں لکھا : مجھے لگتا ہے کہ جب کانگریس کے قائدین آپس میں لڑنے میں مصروف ہیں تو کانگریس پارٹی بی جے پی سے کیا لڑے گی۔
