نئی دہلی: کانگریس صدر سونیا گاندھی نے کہا کہ اس وقت پارٹی میں اتحاد کی سخت ضرورت ہے تاکہ وہ بی جے پی اور آر ایس ایس کے خلاف منظم طور پر لڑ سکے۔ بی جے پی اور اس کے اتحادی جماعتوں کے خلاف ہمیں نظریاتی جنگ لڑنی ہے اور ان کی قلعی کھولنی ہے تاکہ ہم یہ جنگ جیت سکیں۔ اُنھوں نے کہا کہ پارٹی زمینی سطح پر کام نہیں کرسکی اور یہ تاثر مل گیا ہے کہ وہاں پر انہیں کانگریس کے نظریات پر صحیح طور پر بیان نہیں کیا گیا ہے۔ انہوں نے یہ بھی کہاکہ مختلف ریاستوں میں کانگریس میں انتشار چل رہے ہیں اور اسکو ختم کرنے کی ضرورت ہے۔ ذاتی اختلافات کو چھوڑ کر ہمیں ملک کی ترقی اوربہبود کیلئے کام کرنا چاہئے۔ ہم تبھی کامیاب ہوں گے جب ہم ناانصافی کے خلاف متحد ہوکر کام کریں گے۔ انہوں نے پارٹی لیڈروں سے اپنے خطاب میں بی جے پی اور آر ایس ایس کے خلاف لڑنے کیلئے پارٹی میں ڈسپلن اور اتحاد کی ضرورت کی اپیل کی۔
