کریم نگر 23/نومبر (سیاست ڈسٹرکٹ نیوز ) بمقام مسجد دستگیر کریم نگرمیں بصدارت حضرت مولانا خواجہ کلیم الدین اسعدی مجلس العلماء والحفاظ کریم نگر کا اہم مشاورتی اجلاس منعقد ہوا ۔پروگرام کا آغاز حافظ عبد السبحان کی قرات سے ہوا ، اس کے بعد مفتی غیاث محی الدین نائب صدر جمعتہ العلماء کریم نگر، مفتی محمد یونس القاسمی صدر جمعتہ العلماء کریم نگر اور مولانا خواجہ کلیم الدین اسعدی کے اہم خطابات ہوئے جس کا خلاصہ یہ ہے کہ مجلس العلماء و الحفاظ کریم نگر نے تلنگانہ اسمبلی انتخابات میں مکمل طور پر کانگریس کی تائید کا فیصلہ کیا ہے اور کانگریس کی جانب سے جاری کئے گئے انتخابی منشور کا خیر مقدم کرتے ہوئے ریاست تلنگانہ کے مسلمانوں سے اپیل کی کہ وہ تلنگانہ اسمبلی انتخابات میں کھل کر کانگریس کی حمایت کریں اور کریم نگر میں کانگریس کے امیدوار کو کامیاب بنائیں اور سال 2024 میں مجوزہ پارلیمانی انتخابات میں سیکولر قوتوں کو مستحکم و مضبوط کرنے کی حکمت عملی کے طور پر ابھی سے کوششوں کے آغاز کی ضرورت پر زور دیا گیا، نیز ریاست تلنگانہ کے مسلمانوں سے اپیل کی کہ وہ ریاست بھر میں 30 نومبر 2023 کو زیادہ سے زیادہ رائے دہی میں حصہ لیتے ہوئے اپنے حق رائے دہی سے استفادہ کریں اور ملک و ریاست میں جمہوریت کے تحفظ اور آئین کی بالادستی کو یقینی بنانے کیلئے ووٹ کا استعمال کریں۔اس اجلاس میں شہر کے علماء و حفاظ کرام کی ایک بڑی تعداد موجود تھی۔
