تلنگانہ میں کانگریس کا اقتدار یقینی، سابق مرکزی وزیر رینوکا چودھری کا دعویٰ
حیدرآباد۔ 9 جولائی (سیاست نیوز) سابق مرکزی وزیر رینوکا چودھری نے الزام عائد کیا کہ چیف منسٹر کے سی آر اور وزیر اعظم نریندر مودی دونوں ایک ہی ہیں۔ کانگریس کو تلنگانہ میں کمزور کرنے بی جے پی و بی آر ایس نے خفیہ مفاہمت کرلی ہے۔ میڈیا سے بات کرتے ہوئے رینوکا چودھری نے کہا کہ تلنگانہ میں بی جے پی کا کوئی وجود نہیں ہے۔ رینوکا چودھری نے کھمم کا دورہ کرکے کانگریس قائدین کے ساتھ اجلاس منعقد کیا۔ انہوں نے کہا کہ تلنگانہ کے عوام کانگریس اقتدار کے منتظر ہیں۔ کے سی آر نے خاندانی حکمرانی کے ذریعہ نظم و نسق کو تباہ کردیا۔ مرکز بھی لوک سبھا وسط مدتی انتخابات کی تیاری کررہی ہے۔ رینوکا چودھری نے کہا کہ شمالی ہند میں بی جے پی کو لوک سبھا کی 100 نشستیں بھی حاصل نہیں ہونگی۔ بی جے پی عوام کی ترقی کی بجائے مذہب اور ذات پات کی بنیاد پر سماج کو تقسیم کرنا چاہتی ہے۔انہوں نے کہا کہ پارلیمنٹ اور باہر وزیر اعظم مودی بلند بانگ دعوے کررہے ہیں اور کانگریس کو نشانہ بنایا جارہا ہے۔ رینوکا چودھری نے یقین ظاہر کیا کہ مرکز اور ریاست میں کانگریس برسر اقتدار آئے گی۔ ر
