نیویارک: پرتگال کے فٹبالر کرسٹیانو رونالڈو 2024 کے سب سے زیادہ کمانے والے اتھلیٹ قرار دیئے گئے ہیں۔ امریکی جریدے فوربز نے 2024 میں سب سے زیادہ کمانے والے 50 اتھلیٹس کی فہرست جاری کی ہے۔ رونالڈو نے 12 ماہ کے دوران 26 کروڑ ڈالرز کما کر دیگر تمام کھلاڑیوں کو پیچھے چھوڑ دیا۔ پرتگالی اسٹار مسلسل دوسری بار دنیا کے سب سے زیادہ کمائی والے اتھلیٹ بنے ہیں۔ ایک سال کے دوران انہوں نے فٹبال گراؤنڈ سے 20 کروڑ جبکہ میدان سے باہر اشتہارات اور دیگر کے ذریعے 6 کروڑ ڈالرز کمائے۔ انہیں 20 کروڑ ڈالرز سعودی کلب النصر سے معاہدے کے نتیجے میں ملے۔ پہلی بار دنیا میں سب سے زیادہ کمائی والے 10 اتھلیٹس میں سے ہر ایک کی آمدنی سال میں 10 کروڑ ڈالرز سے زیادہ رہی۔ دوسرے نمبر پر ایک گالفر Jon Rahm ہیں جو ایک سال میں 21 کروڑ 80 لاکھ ڈالرز کمانے میں کامیاب رہے۔ تیسرا نمبر ارجنٹینا کے فٹبالر لیونل میسی کا ہے جن کی سالانہ آمدنی 13 کروڑ 50 لاکھ ڈالرز رہی۔ چوتھے اور 5 ویں نمبر پر باسکٹ بال پلیئرز لی بورن جیمز اور Giannis Antetokounmpo ہیں جو ترتیب وار 12 کروڑ 80 لاکھ ڈالرز اور 11 کروڑ 10 لاکھ ڈالرز کمانے میں کامیاب ہوئے۔ فرانس کے نوجوان فٹبالر کیلان ایمباپے 11 کروڑ کمانے میں کامیاب رہے اور وہ فہرست میں چھٹے نمبر پر ہے۔ برازیل کے فٹبالر نیمار 10 کروڑ80 لاکھ ڈالرز کما کر 7 ویں نمبر پر رہے۔ دنیا بھر کے 50 اتھلیٹس کی فہرست میں اس سال حیران کن طور پر کوئی بھی کرکٹر یا ٹینس پلیئر جگہ بنانے میں ناکام رہا۔
