حیدرآباد۔ لاک ڈاؤن کے باوجود شہر میں سنگین وارداتیں رونما ہورہی ہیں اور پولیس کی گشت اور پابندیاں بے اثر دکھائی دے رہی ہیں۔ پرانے شہر کے علاقہ کشن باغ میں کل رات ایک شخص کا بہیمانہ طور پر قتل کردیا گیا۔ بتایا جاتا ہے کہ 24 سالہ محمد اعجاز ساکن کشن باغ کی مخاصمت رفیق اور دیگر افراد سے چل رہی تھی۔ کل اعجاز نے اس کے مکان پہنچ کر بات چیت کرنے کی کوشش کی جس کے دوران داؤد اور دیگر افراد نے اعجاز کی آنکھوں میں مرچ پاؤڈر کا پانی چھڑک کر اسے بے بس کردیا اور بعد ازاں اس کے سر پر وزنی پتھر ڈال کر ہلاک کردیا۔ بتایا جاتا ہے کہ اعجاز پر اقدام قتل کا ایک مقدمہ درج کیا گیا تھا جس کے نتیجہ میں وہ اس مقدمہ کو واپس لینے کیلئے دباؤ ڈال رہا تھا۔ پولیس بہادر پورہ نے اس سلسلہ میں قتل کا مقدمہ درج کرلیا ہے۔
