یوم ِاقبال سے ڈاکٹر تقی عابدی،ضیاء الدین نیئر و پروفیسر محمود صدیقی کا خطاب
حیدرآباد ۔ 20 ۔ نومبر : ( پریس نوٹ ) : اقبال کی زندگی ہی سے حیدرآباددکن اقبال شناسوں کا گہوراہ رہاہے۔ حیات اقبال اور پیام اقبال پر جوکام حیدرآباد میں ہوا اس کی تاریخی اور اسنادی اہمیت ہے۔کلام اقبال کا پہلا اردو مجموعہ دکن سے شائع کیا گیا ۔اقبال شناسی کے فروغ میںقائد ملت نواب بہادر یارجنگ اور قائد محترم جناب سید خلیل اللہ حسینی نے کلیدی کردار اداکیا۔ان خیالات کا اظہار جناب محمد ضیاء الدین نیئر صدر اقبال اکیڈیمی نے یوم ِ اقبال میں کیا۔ انھوں نے کہاکہ علامہ اقبال کے ہاں ابتدا سے جذبہ عشق رسولؐ کا والہانہ اظہار ملتا ہے ۔ انھوں نے کہاکہ کلام اقبال سے اطاعت الہی،حب رسول ؐ،احترام اہل بیتؓ اور اتباع صحابہ ؓ کا درس ملتاہے۔ انہوں نے کہا کہ آج ضرورت ہے کہ نسلِ نو کو علامہ اقبال ؒ کی شخصیت سے روشناس کیا جائے ۔ڈاکٹر سید تقی عابدی نے کہاکہ حکیم الامت علامہ اقبال کی شاعری و نثر کا مطمع نظرکرہ ارض پر تمام انسانوں کی فلاح و بہبود،انسانی عظمت و احترام انسانی حریت ِ فکر و ضمیر ،تہذیبی، ثقافتی اور اخلاقی اقدار ہیں۔علامہ اقبال کی فکر کا نصب العین انسانی برتری اور افضلیت ہے۔علامہ اقبال نے جس پُر جلال و جمال اسلوب میں انسان کی غایتِ تخلیق اور مراتب کا ذکر کیا ،وہ اپنی نظیر آپ ہے ۔ ڈاکٹر تقی عابدی نے علامہ اقبال کی فکری و شعری ارتقاء کے مراحل،سیاسی،سماجی ، تہذیبی و ادبی خدمات پر روشنی ڈالی۔ پروفیسر محمود صدیقی نے کہا کہ علامہ اقبالؒ نے اپنے کلام میں خالق کائنات سے مخلوق کائنات تک خطاب کیا لیکن بطور خاص وہ طلبہ اور نوجوانوں کے شاعر ہیں۔ ان کی تمام تر امیدیں نوجوانوں سے وابستہ ہیں ۔جناب سید رؤف ریحان معتمد عمومی اقبال اکیڈیمی نے خیر مقدمی تقریر کی اور کہا کہ علامہ اقبال کے کلام ،افکار اور نظریات کو فروغ دینا اقبال اکیڈیمی کا بنیادی مقصد ہے۔ قاری محمد سلیمان کی قرات کلام پاک سے آغاز ہوا۔جناب سید شاہ نواز ہاشمی نے کلام اقبا ل پیش کیا۔جناب شفیع شریف نے نعت شریف پیش کی۔ ڈاکٹر سید فاضل حسین پرویز ، سید محمود ہاشمی، ڈاکٹر سید شفیع الدین اعجاز،سیف الرحیم قریشی ، جاوید محی الدین و دیگر موجود تھے۔ جناب انیس احمد شریک معتمد اقبال اکیڈیمی نے کلمات تشکر اداکئے۔یوم اقبال میں تحریری و تقریری مقابلہ جات میں کامیاب طلباء میں انعامات و اسناد تقسیم کئے گئے۔
