نئی دہلی : کانگریس لیڈر راہول گاندھی نے پیر کے روز حکومت کی جانب سے کورونا متاثرین کے لواحقین کو چار لاکھ روپے کی مالی امداد فراہم کرنے سے انکار پر سخت ردعمل کا اظہار کرتے ہوئے کہا کہ مودی حکومت وبا کی شروعات سے ہی عوام کے تئیں بہیمانہ رویہ اپنا رہی ہے ۔ راہول نے کہا کہ کورونا متاثرین کے علاج کیلئے سہولیات کی شدید قلت ہے جس کی وجہ سے بڑی تعداد میں لوگ اپنی زندگیوں سے ہاتھ دھو بیٹھے ہیں۔ انہوں نے کہا کہ ایک طرف لاکھوں افراد علاج کے فقدان کے سبب کورونا کی وجہ سے فوت ہوگئے اور دوسری طرف حکومت مرنے والوں کی تعداد کے حوالے سے جھوٹے اعدادوشمار دے کر اپنی بہیمیت کا ثبوت پیش کررہی ہے ۔
