سیاسی مخالفین کے خلاف مقدمہ درج کرنے کا حکومت پر الزام
حیدرآباد ۔ 20۔نومبر (سیاست نیوز) بی آر ایس کے رکن کونسل ڈاکٹر ڈی شراون نے فارمولہ ای ریس معاملہ میں بی آر ایس ورکنگ پریسیڈنٹ کے ٹی آر کے خلاف مقدمہ کو سیاسی انتقامی کارروائی کا قرار دیا ۔ گورنر کی جانب سے کے ٹی آر کے خلاف کارروائی کی اجازت کے بعد تبصرہ کرتے ہوئے ڈی شراون نے کہا کہ چیف منسٹر ریونت ریڈی نے ایک بے بنیاد مقدمہ تیار کرتے ہوئے کے ٹی آر کو سیاسی طور پر پھنسانے کی کوشش کی ہے تاکہ کے ٹی آر کے امیج کو متاثر کرتے ہوئے عوام کو گمراہ کیا جائے ۔ ڈاکٹر شراون نے کہا کہ فارمولہ ای ریسنگ کا مقدمہ بے بنیاد ہے اور اس کی کوئی شواہد اور ثبوت نہیں ہے ۔ قانون کے آگے یہ مقدمہ ٹک نہیں پائے گا ۔ انہوں نے کہا کہ چیف منسٹر ریونت ریڈی نے کے ٹی آر کے خلاف شخصی عناد کے نتیجہ میں اینٹی کرپشن بیورو کے ذریعہ مقدمہ درج کرایا ہے۔ انہوں نے الزام عائد کیا کہ تلنگانہ حکومت جمہوری اداروں کا استعمال کرتے ہوئے سیاسی مخالفین کو نشانہ بنارہی ہیں۔ کے ٹی آر نے حیدرآباد کے برانڈ امیج کو دنیا بھر میں عام کیا اور حیدرآباد کی ترقی کے ذریعہ عالمی سرمایہ کاری کی راہ ہموار کی ہے ۔ ڈی شراون نے کہا کہ فارمولہ ای ریسنگ کے ذریعہ حیدرآباد میں سرمایہ کارروائی اور روزگار کے نئے مواقع پیدا کرنے کی کوشش کی گئی ۔ انہوں نے مخالفین کے خلاف حکومت کی جانب سے گمراہ کن مقدمات کا الزام عائد کیا۔ ڈی شراون نے یقین ظاہر کیا کہ عدالت میں سچ ثابت ہوگا اور کے ٹی آر کے خلاف مقدمہ ٹک نہیں پائے گا۔ عدلیہ مقدمہ کی سچائی کو بے نقاب کرے گی۔1
