کورونا،حیدرآباد میں گلدستوں کے کاروبار پر اثرانداز
حیدرآباد۔ پھولوں کے گلدستوں کے کاروبار پر کورونا کا اثر دیکھاگیا۔کسی بھی اچھے کام، تقاریب اور دیگر کے لئے استعمال ہونے والے پھولوں کے گلدستوں کی دکانات اب گاہکوں سے خالی نظر آرہی ہیں،گریٹرحیدرآباد میں تقریبا 500 پھولوں کی دکانات ہیں جہاں گلدستے تیار کئے جاتے ہیں جو سڑک کے کنارے کاروبار کرتے ہیں۔ سالگرہ ، شادی کی سالگرہ، وظیفہ پر سبکدوشی،تہنیت کی پیشکشی اور دیگر تقاریب کے موقع پر پھولوں کے گلدستے پیش کرنا ایک اہم روایت تھی جو گم ہوگئی ہے اور اس کاروبار پر لاک ڈاون نے اپنا اثر ڈالا ہے ۔ کورونا کے پیش نظر گریٹرحیدرآباد میونسپل کارپوریشن(جی ایچ ایم سی)حدود میں کہیں بھی بڑی شادیاں اور دیگر تقاریب نہیں ہورہی ہیں جس کی وجہ سے ان کا کاروبا متاثر ہوا ہے ۔کورونا وبا سے پہلے ہر ایک دکان میں 50تا70گلدستے فروخت کئے جاتے تھے تاہم موجودہ صورتحال میں پانچ تا دس گلدستے فروخت ہونا بھی مشکل ہے ۔ایک دکان پر پانچ تادس افراد روزگار کے لئے منحصر تھے تاہم روزگار کی محرومی کی وجہ سے یہ افراد اپنے آبائی مقامات کے لئے روانہ ہوگئے اور دکانات کے مالکین ہی خود گلدستے تیارکرتے ہوئے ان کو فروخت کررہے ہیں۔ان دکانات کے مالکین نے کہا کہ ان کاکاروبار کافی کم ہوگیا ہے ۔ایک تاجر نے کہا کہ اس کے پاس 6تا8ورکرس تھے ، کاروبار نہ ہونے کی وجہ سے ان کو ان کے آبائی مقام کولکتہ بھیج دیا گیاہے ۔ایک تاجر نے کہاکہ لاک ڈاون سے پہلے ہر شادی خانہ میں سجاوٹ کا کام کیاجاتا تھا جو اب نہیں ہورہا ہے ۔انہوں نے کہاکہ ان کے کاروبار میں اضافہ کے لئے شادیوں کے لئے مناسب اجازت درکار ہے ۔