نلگنڈہ۔26/نومبر (سیاست ڈسٹرکٹ نیوز) ضلع کلکٹر ایلا ترپاٹھی نے کہا کہ گرام پنچایت انتخابات کو شفاف منصفانہ طور پر منعقد کرنا متعلقہ عملہ کی اولین ذمہ داری ہے۔ وہ آج احاطہ کلکٹریٹ میں واقع ادیادتیہ بھون میں نلگنڈہ و چنڈ ور ڈویڑنوں کے آر اوز، اے آر اوز اور ایم پی ڈی اوز کے تربیتی پروگرام سے خطاب کر رہی تھیں۔ضلع کلکٹر نے بتایا کہ پہلے مرحلے میں 14 منڈلوں میں 117 کلسٹروں سے نامزدگیاں حاصل کی جائیں گی۔ انہوں نے ہدایت دی کہ کاغذاتِ نامزدگی کی وصولی کے دوران الیکشن کمیشن کی تمام ہدایات پر سختی سے عمل کیا جائیوقت کی پابندی ہوپولیس سیکیورٹی کے مناسب انتظامات کیے جائیں اور ہیلپ ڈیسک قائم کیا جائے۔محترمہ ایلا ترپاٹھی نے مزید کہا کہ کافی تعداد میں نامزدگی فارم دستیاب رکھے جائیں اور ضابطہ اخلاق پر مکمل عمل درآمد کویقینی بنایا جائے۔ اس پروگرام میں ایڈیشنل کلکٹر نارائنا امیت، زیڈ پی سی ای او سری نواس راؤ، ڈی پی او وینکیا اور آر ڈی اوز اشوک ریڈی و سری دیوی بھی شریک تھے۔
