ناردا اسٹنگ آپریشن معاملے میں گرفتار ترنمول کانگریس کے سینئر لیڈران سبرتو مکھرجی، فرہاد حکیم ،مدن مترا اور سابق ریاستی وزیر شوبھن چٹرجی کی درخواست ضمانت پر کل بھی کلکتہ ہائی کورٹ کوئی فیصلہ نہیں سناسکی ہے۔اب آج دوبارہ دو بجے اس معاملے کی سماعت ہوگی ۔قائم مقام چیف جسٹس کی قیادت والی ڈویژن بنچ میں ترنمول کانگریس کے لیڈروں وکلا اور سی بی آئی کی جانب سے پیش ہونے والے سالسٹر جنرل تشار مہتا کے درمیان سخت بحث ہوئی۔تاہم سبرتو مکھرجی کے وکیل نے سالیسٹرجنرل پر الزام عاید کیا کہ انہوں نے جا ن بوجھ کر اس معاملے کی سماعت میں تاخیر سے کام لیا ہے۔ڈھائی گھنٹے تک چلی اس بحث میں تشار مہتا نے ان لیڈروں کی گرفتاری کے خلاف ترنمول کانگریس کے حامیوں کے احتجاج اور ممتا بنرجی کی سی بی آئی کے دفتر میں موجودگی کا حوالہ دیتے ہوئے کہا کہ بنگال میں موجودہ صورت حال اس کیس پر سماعت کے لایق نہیں ہے ۔اس لئے اس معاملے کو دوسری جگہ منتقل کیا جائے۔تشار مہتا نے کہا کہ ممتا بنرجی نے سی بی آئی کے افسران پر دبائو بنانے کی کوشش کی ۔اسی دبائو کا نتیجہ ہے کہ نچلی عدالت کے جج نے ان لوگوں کی ضمانت کو منظور ی دیدی۔
