ممبئی، 24 مئی (آئی اے این ایس)۔ دائیں ہاتھ کے بیٹر شبمن گِل کو انگلینڈ کے خلاف پانچ ٹسٹ میچوں کے دورے کے لیے ہندوستان کا 37واں ٹسٹ کپتان مقررکردیا گیا ہے۔ چیف سلیکٹر اجیت اگرکر نے ہفتہ کو18 رکنی اسکواڈ کا اعلان کیا۔ یہ سیریز20 جون کو شروع ہو رہی ہے۔وکٹ کیپر بیٹر رشبھ پنت کو نائب کپتان نامزد کیا گیا ہے۔ اجیت اگرکر کی سربراہی میں سلیکشن کمیٹی نے بی سی سی آئی کے سیکریٹری دیواجیت سائیکیا کی موجودگی میں، جو اجلاس کے کنوینر بھی تھے، ممبئی میں بی سی سی آئی ہیڈکوارٹرز میں یہ ٹیم منتخب کی۔ بعد ازاں اگرکر اور شیو سندر داس نے ایک رسمی پریس کانفرنس میں ٹیم کا اعلان کیا۔ اگرکر نے کہا ہم نے ہر ممکن متبادل پر غورکیا، پچھلے ایک سال کے دوران مختلف مواقع پر شبمن پر نظر رکھی گئی۔ ٹیم ڈریسنگ روم سے کافی فیڈبیک لیا۔ ہمیں امید ہے کہ وہ یہ ذمہ داری نبھائیں گے۔ کپتان کو ایک یا دو ٹورز کے لیے منتخب نہیں کیا جاتا۔ گزشتہ ایک دو سالوں میں ان کی کارکردگی میں تسلسل نظر آیا ہے۔ اس میں کوئی شک نہیں کہ یہ ایک بہت سخت امتحان ہوگا۔ شبمن گِل نے ہندوستان کے لیے ٹسٹ کرکٹ میں اوپنر اور نمبر تین بیٹرکے طور پر کھیلا ہے۔ وہ اب اس فارمیٹ میں قیادت کی ذمہ داری سنبھالیں گے، کیونکہ روہت شرما نے رواں ماہ کے آغاز میں ٹسٹ کرکٹ سے ریٹائرمنٹ کا اعلان کیا تھا۔ گِل نے اب تک 32 ٹسٹ میچوں میں 35.1 کی اوسط سے 1893 رنز بنائے ہیں، جن میں پانچ سنچریاں اور سات نصف سنچریاں شامل ہیں۔ شبمن گِل کو اس سے قبل ہندوستانی ٹی20 ٹیم کی قیادت کا تجربہ ہے، جب انہوں نے گزشتہ سال زمبابوے کے خلاف 1-4 سے سیریز جیتی تھی۔ وہ وائٹ بال کرکٹ میں نائب کپتان بھی رہے، اور ہندوستان کے 2025 چیمپئنز ٹرافی فتح کے دوران بھی اس کردار میں شامل تھے۔ 25 سالہ گِل اس وقت آئی پی ایل 2025 میں گجرات ٹائٹنز کی قیادت کر رہے ہیں، جو پوائنٹس ٹیبل پر سرفہرست ہے ۔ ساتھی کھلاڑی اور کوچنگ اسٹاف ان کی قائدانہ صلاحیت، ٹھنڈے مزاج اور حکمت عملی کی سوجھ بوجھ کی تعریف کرتے ہیں۔ ٹیم میں کرون نائر سات سال بعد واپسی کر رہے ہیں، جبکہ ارشدیپ سنگھ اور بی سائی سدرشن کو پہلی بار ٹسٹ اسکواڈ میں شامل کیا گیا ہے۔
ہندوستانی ٹیم : شبمن گِل (کپتان)، رشبھ پنت (نائب کپتان و وکٹ کیپر)، یشسوی جیسوال، کے ایل راہل، بی سائی سدرشن، ابھیمنیو ایشورن، کرون نائر، نتیش کمار ریڈی، رویندر جڈیجہ، دھروو جریال (وکٹ کیپر)، واشنگٹن سندر، شاردل ٹھاکر، جسپریت بمراہ، محمد سراج، پرسِدھ کرشنا، آکاش دیپ، ارشدیپ سنگھ، کلدیپ یادو۔
