نئی دہلی : کانگریس نے کہا ہے کہ تین شمال مشرقی ریاستوں کے اسمبلی انتخابات کے نتائج اس کے لیے مایوس کن رہے ، لیکن مختلف ریاستوں میں ہوئے ضمنی انتخابات کے نتائج بہت حوصلہ افزا ہیں۔جمعرات کو یہاں پارٹی ہیڈکوارٹر میں ایک پریس کانفرنس میں انتخابی نتائج پر ردعمل ظاہر کرتے ہوئے کانگریس کے کمیونیکیشن انچارج جے رام رمیش نے کہا کہ ریاستوں میں پارٹی کی تنظیم مضبوط ہے اور یہ کہنا غلط ہے کہ شمال مشرق میں پارٹی کے اعلیٰ لیڈران انتخابی مہم میں نہیں گئے تھے ۔ انہوں نے کہا کہ مقامی انتخابات میں پارٹی کی تنظیم اور ضلع اور ریاستی سطح کے لیڈر زیادہ موثر ہوتے ہیں۔ اس بار اسمبلی اور ضمنی انتخابات کے نتائج پارٹی کے لیے مایوس کن اور حوصلہ افزا رہے ہیں۔انہوں نے ضمنی انتخابات کے نتائج کو پارٹی کے لیے حوصلہ افزا قرار دیتے ہوئے کہا کہ مغربی بنگال کے ضمنی انتخابات میں پارٹی کی کارکردگی بہت اچھی رہی۔ مہاراشٹر میں تو 30 سال کے بعد کانگریس نے بی جی پی۔آر ایس ایس کے گڑھ پر فتح حاصل کی ہے اور یہ بہت مثبت ہے ۔ تمل ناڈو کے ضمنی انتخابات میں کانگریس کے تمام سینئر لیڈر جس فرق سے وہ جیتے وہ بہت حوصلہ افزا ہے ۔ اس سے صاف ہے کہ کانگریس کو اب پورے ملک میں مینڈیٹ ملنے لگا ہے ۔
