ویلنگٹن ،18مارچ (سید مجیب کی رپورٹ) نیوزی لینڈ کی وزیراعظم جیسنڈا آرڈرن نے کرائسٹ چرچ حملہ میں جاں بحق افراد کی یاد میں تعزیتی بک میں تاثرات درج کئے ۔ انہو ں نے لکھا۔ ’’ہم ایک ہیں۔ یہ ہمارا مشترکہ دکھ ہے‘‘۔ تعزیتی کتاب میں دستخط کے موقع پر گورنر جنرل بھی ان کے ہمراہ تھیں۔ انہوں نے اپنے تاثرات قلمبند کرتے ہوئے لکھا کہ ہمارے دل اور ہمارے احساسات کرائسٹ چرچ کے غمزدہ خاندانوں کے ساتھ ہیں۔دوسری جانب حملہ کا نشانہ بننے والی مساجد کے قریب پھول رکھنے کا سلسلہ جاری ہے ، پھول رکھنے والوں میں ہر مذہب اور قوم کے افراد شامل ہیں۔ادھر یونانی حکام کا کہنا ہے کہ حملہ آور برینٹن ٹیرینٹ مارچ 2016 میں یونان آیا اور یہاں کچھ روز قیام کیا تھا۔آسٹریلوی پولیس نے نیو ساؤتھ ویلز میں دو مکانات پر چھاپے مارے جن کا ماضی میں برینٹن ٹیرینٹ سے تعلق تھا۔ دریں اثنالندن سے ملنے والی اطلاعات کے مطابق نسلی و مذہبی تعصب اور اسلاموفوبیا کے خلاف لندن اور گلاسگو میں ریلیاں نکالی گئیں، ہزاروں افراد نے مسلمانوں سے یکجہتی کا اظہار اور اسلامو فوبیا کے خلاف قانون سازی کا مطالبہ کیا۔
