بنگلور 23اکتوبر (یواین آئی) کرناٹک کے نائب وزیر اعلی ڈی کے شیوکمار نے حکمراں کانگریس پارٹی میں قیادت کی جانشینی کے بارے میں وزیر اعلی سدارامیا کے بیٹے ڈاکٹر یتندرا سدارامیا کے حالیہ بیان پر تبصرہ کرنے سے انکار کردیا۔ آندھرا پردیش میں راگھویندر سوامی مٹھ کے اپنے دورے کے دوران میڈیا سے بات کرتے ہوئے مسٹر شیوکمار نے کہاکہ “آپ ان سے (یتندرا) سے پوچھیں کہ انہوں نے کیا کہا، اگر آپ مجھ سے پوچھیں تو میں کیا کہہ سکتا ہوں؟نائب وزیر اعلیٰ نے پارٹی کی ہدایات کے تئیں اپنی وابستگی پر زور دیتے ہوئے کہاکہ سدارامیا اور میں نے کہا ہے کہ ہم پارٹی کی ہدایات پر عمل کریں گے اور مل کر کام کریں گے ۔ میں اس کے لیے پابند عہد ہوں۔ یتندرا نے حال ہی میں کہا کہ ان کے والد اپنے سیاسی کیریئر کے اختتام کے قریب ہیں اور انہوں نے وزیر ستیش جارکی ہولی کے لیے ممکنہ جانشین کے طور پر حمایت کا بھی اظہار کیا۔ ان کے تبصروں نے کرناٹک کانگریس میں قیادت کی تبدیلی کے بارے میں قیاس آرائیوں کو ہوا دی ہے ۔
