15 جنوری کے بعد ہندوستان کا دور کرنے والے افراد سے رابطہ کرنے کی درخواست
بیجنگ 4 فروری (سیاست ڈاٹ کام) چین میں کرونا وائرس کی وباء کے پیش نظر ہندوستان نے چین کے لئے ویزا قواعد میں مزید سختی کردی ہے اور چین کے لئے تمام موجودہ ویزا کو منسوخ کردیا ہے۔ ہندوستان نے 2 فروری کو چین کا سفر کرنے والوں اور چین میں مقیم بیرونی افراد کے لئے ای ویزا کی سہولت معطل کردی تھی۔ چین کے شہر دوہان میں کرونا وائرس کی وباء پھوٹ پڑی ہے جس کے نتیجہ میں فوت ہونے والوں کی تعداد بڑھ کر 425 ہوگئی ہے جن میں 64 افراد کی پیر کو موت واقع ہوئی ہے۔ چینی محکمہ صحت کے حکام کے مطابق اس وائرس سے متاثر ہونے والوں کی تعداد میں مسلسل اضافہ ہورہا ہے۔ ہندوستان میں ریگولر یا ای ویزا کے ساتھ مقیم ایسے افراد جو 15 جنوری کے بعد چین سے سفر کئے ہیں ان سے درخواست کی گئی ہے کہ وہ حکومت ہند کی وزارت صحت و خاندانی بہبود سے ہاٹ لائن نمبر 91-11-2397 پر رابطہ کریں یا
[email protected]
پر میل کریں۔ بیجنگ میں ہندوستانی سفارت خانہ کی جانب سے یہ اعلان کیا گیا۔ یہ بھی وضاحت کی گئی ہے موجودہ ویزے کارکرد نہیں ہوں گے۔ ہندوستان کا سفر کرنے کے خواہشمند افراد سے درخواست کی گئی ہے کہ بیجنگ میں ہندوستانی سفارت خانہ سے رابطہ کریں یا شنگھائی میں قونصل خانہ سے بھی رابطہ کیا جاسکتا ہے جہاں ہندوستان کے لئے نئے ویزا کی درخواست دی جاسکتی ہے۔ مہلک کرونا وائرس 25 سے زائد ممالک تک پھیل چکا ہے جن میں ہندوستان بھی شامل ہے جہاں تاحال کرونا وائرس کے تین کیسیس مثبت پائے گئے ہیں جن کا تعلق کیرالا سے ہے۔ یہ تینوں مریض چین کے شہر ووہان سے ہندوستان واپس ہوئے ہیں۔ اس وقت 647 ہندوستانی شہری جن کا ووہان اور ہوبئی شہر سے انخلاء کروادیا گیا ہے وہ دہلی کے قریب ہاسپٹل میں 14 دنوں کے لئے طبی نگرانی میں ہیں۔