ڈاکٹروں کو سب سے پہلے کورونا ویکسن دیا جائے گا: محکمہ صحت
حیدرآباد: تلنگانہ میں جنوری کے پہلے ہفتہ میں ریاستی محکمہ صحت کی جانب سے ٹیکہ اندازی مہم کا آغاز کیا جائے گا۔ڈائریکٹر محکمہ صحت ڈاکٹر جی سرینواس راؤ نے اس بات کی توثیق کرتے ہوئے کہا کہ ریاست تلنگانہ میں جنوری کے پہلے ہفتہ سے کورونا وائرس کے ٹیکہ کا آغاز کیا جائے گا اور اس سلسلہ تربیت فراہم کرنے کا عمل شروع کیا جا چکا ہے۔ انہو ںنے بتایا کہ ریاستی حکومت کی جانب سے اب تک جو تفصیلات حاصل کی گئی ہیں ان کے مطابق ریاست میں استعمال کرنے کیلئے محکمہ صحت تلنگانہ کو 3کروڑ ٹیکہ فراہم کئے جائیں گے جو کہ اسٹاک میں پہنچتے رہیں گے۔ ڈاکٹر جی سرینواس راؤ نے کہا کہ ریاستی حکومت نے محکمہ صحت ماہ جنوری میں کئے جانے والے ان اقدامات کے سلسلہ میں تفصیلات حاصل کی ہیں۔ انہو ںنے بتایا کہ تلنگانہ میں سب سے پہلے ٹیکہ ڈاکٹرس کو دیا جائے گا اور ان کے ساتھ ساتھ طبی عملہ کو کورونا وائرس سے محفوظ رہنے کا ٹیکہ دینے کے اقدامات کئے جائیں گے۔ انہو ںنے بتایا کہ ابتداء میں 4 محکمہ جات میں خدمات انجام دینے والے 75لاکھ ملازمین کو ٹیکہ دینے کی تیاری کرلی گئی ہے اور جنوری کے پہلے ہفتہ سے شروع کی جانے والی اس مہم کے دوران ریاستی محکمہ صحت کے تربیت یافتہ عملہ کی جانب سے ٹیکہ اندازی کی جائے گی۔ڈاکٹر جی سرینواس نے بتایا کہ ریاست میں ان 4محکمہ جات کے ملازمین کو ٹیکہ دینے کے بعد ریاستی حکومت کے محکمہ صحت کی جانب سے سے مراکز رائے دہی کی طرح مراکز قائم کئے جائیں گے اور ان مراکز کے ذریعہ شہریوں کو کورونا وائرس کا ٹیکہ دیا جائے گا۔ انہوں نے ٹیکہ کی تفصیلات سے واقف کرواتے ہوئے کہا کہ کورونا وائرس کے اس ٹیکہ کے دوخوراک ہیں اور پہلے ٹیکہ کے 4 ہفتوں بعد دوسرا ٹیکہ دیا جائے گا۔