ماڈل مریم محمد پہلی باریو اے ای کی نمائندگی کریں گی
دبئی ۔6؍اکتوبر ( ایجنسیز )متحدہ عرب امارات کی تاریخ میں پہلی بار ایک اماراتی نژاد خاتون مس یونیورس کے بین الاقوامی مقابلے میں اپنے ملک کی نمائندگی کریں گی۔ 26 سالہ مریم محمد، جو ایک فیشن اسٹوڈنٹ اور ماڈل ہیں نومبر میں تھائی لینڈ میں ہونے والے اس عالمی مقابلے میں متحدہ عرب امارات کی پہلی مرتبہ نمائندگی کریں گی۔مس یونیورس 2025 کا مقابلہ تھائی لینڈ کے شہر میں منعقد ہوگا جہاں دنیا بھر کی 130 سے زائد خوبصورت خواتین اپنے اپنے ممالک کی نمائندگی کریں گی۔ مریم محمد کی شرکت نہ صرف متحدہ عرب امارات بلکہ پورے عرب عالم کیلئے ایک اہم سنگ میل کی حیثیت رکھتی ہے۔مریم محمد اس وقت فیشن ڈیزائننگ کی تعلیم حاصل کر رہی ہیں اور ماڈلنگ کے شعبہ میں بھی فعال ہیں۔ ان کی اس مقابلہ میں شرکت نے نہ صرف اماراتی میڈیا بلکہ بین الاقوامی ذرائع ابلاغ کی توجہ اپنی طرف مبذول کروائی ہے۔ یہ مقابلہ روایتی خوبصورتی کے معیارات سے ہٹ کر خواتین کی قیادت کی صلاحیتوں، ذہانت اور سماجی خدمات پر بھی توجہ مرکوز کرتا ہے۔مس یونیورس آرگنائزیشن کے مطابق یہ مقابلہ خواتین کو بااختیار بنانے اور انہیں عالمی سطح پر اپنی صلاحیتیں دکھانے کا موقع فراہم کرنے کیلئے وقف ہے۔ مریم محمد کی شرکت اس لحاظ سے بھی اہم ہے کہ وہ ایک ایسے ملک کی نمائندگی کر رہی ہیں جہاں خواتین تعلیم، کاروبار اور دیگر شعبوں میں تیزی سے ترقی کر رہی ہیں۔
