دبئی ۔19 جولائی (سیاست ڈاٹ کام ) انٹرنیشنل کرکٹ کونسل (آئی سی سی) نے زمبابوے کرکٹ کے معاملات میں حکومتی مداخلت کے سبب زمبابوے کی رکنیت کو فوری طور پر معطل کردیا ہے۔ زمبابوے کرکٹ میں ایک عرصے سے حکومتی مداخلت کا سلسلہ جاری تھا جس سے ٹیم کی کارکردگی ایک عرصے سے تنزلی کا شکار تھی اور وہ ورلڈ کپ 2019 کے لئے بھی کوالیفائی کرنے میں ناکام رہی تھی۔بورڈ کے معاملات میں حکومتی مداخلت کو رواں سال جون میں باقاعدہ آئینی شکل دی گئی جس کے تحت پورے کرکٹ بورڈ اور اس کے ایم ڈی کو معطل کر دیا گیا تھا اور اسی امر کو دیکھتے ہوئے انٹرنیشنل کرکٹ کونسل نے زمبابوے کی رکنیت معطل کی۔ اس کا فیصلہ لندن میں آئی سی سی کی سالانہ کانفرنس میں کیا گیا جس میں چند نئے قوانین اور ضوابط بھی متعارف کروائے گئے جن کا اطلاق رواں سال سے ہوگا۔زمبابوے کرکٹ نے بورڈ میں حکومتی مداخلت کے حوالے سے آئی سی سی کے قانون کے دفعہ 2.4 کے سیکشن سی اور ڈی کی مخالفت کی۔ رکنیت کی معطلی کے سبب آئی سی سی کی جانب سے زمبابوے کو دی جانے والی مالی معاونت اور فنڈنگ بھی منجمد کردی گئی ہے، جبکہ ٹیم اور اس کے اراکین کسی بھی آئی سی سی ایونٹ میں شرکت نہیں کر سکیں گے۔آئی سی سی کی جانب سے ممکنہ طور پر فنڈز اس لیے روکے گئے ہیں کیونکہ کھیل کی عالمی گورننگ باڈی کو خطرہ تھا کہ یہ فنڈز زمبابوے حکومت کو نہ منتقل کر دیئے جائیں۔ یہ کرکٹ کی تاریخ میں پہلا موقع ہے کہ کسی بھی مکمل رکنیت کے حامل ملک کی رکنیت کو معطل کیا گیا ہے۔ کھیل کی عالمی گورننگ باڈی کی جانب سے زمبابوے حکام کو ہدایت دی گئی ہے کہ وہ تین ماہ کے اندر کرکٹ بورڈ میں منتخب شدہ افراد کو دوبارہ بحال کرے جس کے بعد اس سلسلے میں مزید پیشرفت کا جائزہ اکتوبر میں ہونے والے بورڈ کے اجلاس میں لیا جائے گا۔ آئی سی سی کے چیئرمین ششانک منوہر نے کہا کہ ہم نے فیصلے سے قبل زمبابوے حکومت اور اس کی کرکٹ کے نمائندوں کے موقف کو سنا، ہم اس معاملے کو نظر انداز نہیں کر سکتے اور ہمیں کھیل کو سیاسی مداخلت سے پاک رکھنا ہوگا۔انہوں نے کہا کہ زمبابوے میں جو کچھ ہوا وہ آئی سی سی کے ضابطہ اخلاق کی سنگین خلاف ورزی ہے۔ انٹرنیشنل کرکٹ کونسل کی جانب سے پابندی کے بعد اب زمبابوے ٹیم کی ورلڈ ٹی 20 کے کوالیفائرز میں شرکت بھی خطرے میں پڑ گئی ہے۔آئی سی سی نے قواعد و ضوابط پر عمل نہ کرنے پر کروشیا کرکٹ فیڈریشن اور زیمبیا کرکٹ یونین کی رکنیت بھی معطل کردی ہے جبکہ قواعد و ضوابط کی مستقل نافرمانی پر مراکش کی رائل کرکٹ فیڈریشن کو آئی سی سی سے نکال دیا گیا ہے۔اس کے ساتھ آئی سی سی کے اجلاس میں کرکٹ کے چند نئے قوانین بھی متعارف کروانے کا فیصلہ کیا گیا اور اب سر پر گیند لگنے کی صورت میں ریٹائرڈ ہرٹ ہونے والے کھلاڑی کا متبادل میدان میں آکر بیٹنگ اوربولنگ کر سکے گا۔ اس قانون کا اطلاق رواں سال آسٹریلیا اور انگلینڈ کے درمیان تاریخی ایشز سیریز سے ہو گا۔ اس بات کا فیصلہ ڈومیسٹک سطح پر اس قانون کی کامیابی کے بعد کیا گیا۔نئے قانون کے تحت کسی بھی کھلاڑی کے سر پر گیند لگنے کے سبب زخمی یا ریٹائرڈ ہرٹ ہونے کی صورت میں اس کا متبادل کھلاڑی میدان میں آ کر بیٹنگ یا بولنگ کر سکے گا ۔
