دبئی ۔16 اکٹوبر (سیاست ڈاٹ کام )کرکٹ کی عالمی گورننگ باڈی انٹرنیشنل کرکٹ کونسل(آئی سی سی) نے ایک نئے ٹورنمنٹ کی منظوری دے دی ہے جس کے بعد اس کا دنیا کے طاقتور ترین بورڈ بی سی سی آئی سے مخالفت کا سامنا ہے۔آئی سی سی نے اپنے کیلنڈر میں ہر سال ایک اضافی ٹورنمنٹ کی منظوری دی جہاں مذکورہ ٹورنمنٹ 2023 ورلڈ کپ کے بعد سے ہر سال کھیلا جائے گا اور یہ سلسلہ 2031 تک جاری رہے گا۔ آئی سی سی نے دبئی میں اپنے اجلاس میں فیصلہ کیا کہ 2023 سے 2031 تک ہر سال مردوں اور خواتین کا ایک آئی سی سی ٹورنمنٹ منعقدکروایا جائے گا۔اس طرح 2023 سے 2031 تک دو 50 اوورز کے ورلڈکپ، 4 ٹی20 ورلڈ کپ اور اس کے علاوہ دو اورایونٹ بھی منعقد ہوں گے جو ممکنہ طور پر50 اوورز کے ایونٹ ہو سکتے ہیں۔ ذرائع کے مطابق ان دو ٹورنمنٹس کے بارے میں اب تک کوئی حتمی فیصلہ نہیں ہو سکا لیکن یہ 6 ٹیموں پر مبنی 50 اوورزکا ایونٹ ہو سکتا ہے۔ بی سی سی آئی نے فیصلے پر اپنے تحفظات کا اظہار کیا ہے اور بورڈ کے صدر کے عہدے کے امیدوار اورسابق کپتان سارو گنگولی نے کہا کہ وہ آئی سی سی کے منافع میں ہندوستان کے منافع پر ازسرنوغورکرنا چاہتے ہیں۔ ہندوستان نے آئی سی سی کے اس فیصلے کی مخالفت کی جہاں ان کا موقف ہے کہ ہر سال ایک آئی سی سی ایونٹ کے انعقاد کے نتیجے میں دوطرفہ سیریز متاثر ہوں گی۔
