نئی دہلی : آئی پی ایل 2025 کا جوش و خروش اپنے عروج پر ہے۔ اس دوران ایک حیران کن خبر سامنے آئی ہے۔ میڈیا رپورٹس کے مطابق آئی پی ایل کے 18ویں سیزن کو فکسڈ کرنے کی کوششیں کی جارہی ہیں۔ بی سی سی آئی کے اینٹی کرپشن اینڈ سیکیورٹی یونٹ (اے سی ایس یو) نے لیگ کی تمام 10 ٹیموں کو پہلے ہی خبردارکردیا ہے۔ انہوں نے خبردارکیا ہے کہ اگر کوئی ان سے رابطہ کرنے کی کوشش کرتا ہے تو فوراً اس کی اطلاع دیں۔ اے سی ایس یوکے مطابق اس وقت ٹورنمنٹ پر کرپشن کے بادل منڈلا رہے ہیں۔ اس کے لیے کھلاڑیوں، کوچز، معاون عملہ، ٹیم کے مالکان اورکمنٹیٹرزکے اہل خانہ کو مداح ظاہر کرکے اور انہیں مہنگے تحائف دے کر منانے کی کوشش کی جارہی ہے۔ کرک بزکی ایک رپورٹ کے مطابق، اے سی ایس یو کا ماننا ہے کہ حیدرآباد میں مقیم ایک تاجر ٹورنمنٹ میں حصہ لینے والوں سے دوستی کرنے کی کوشش کررہا ہے۔ اگرچہ ابھی تک اس کا انکشاف نہیں ہوا ہے لیکن یہ ضرور سامنے آیا ہے کہ اس تاجر کے بکیز سے براہ راست رابطے ہیں۔ وہ اس سے قبل بھی ایسی بدعنوان سرگرمیوں میں ملوث رہا ہے۔ ان کا پرانا ریکارڈ ہے۔ اس لیے اے سی ایس یو نے ہر اس شخص کو خبردارکیا ہے جو کسی بھی طرح سے آئی پی ایل سے وابستہ ہیں۔ یہ بھی کہا گیا ہے کہ اگر یہ تاجر کسی بھی طرح سے رابطہ کرنے کی کوشش کرے تو فوری اطلاع دیں۔ اس کے ساتھ کسی بھی ممکنہ تعلق یا وابستگی کا بھی انکشاف کریں۔ رپورٹ کے مطابق یہ شخص خودکو مداح بتا کرکھلاڑیوں، کوچز، معاون عملہ اور فرنچائز مالکان کے قریب جانے کی کوشش کررہا ہے۔ مبینہ طور پر اسے ٹیم ہوٹل اور میچوں میں بھی دیکھا گیا ہے۔ وہ اپنے اہداف خانگی تقاریب کو دعوت دے رہا ہے۔ اطلاعات یہ بھی ہیں کہ وہ نہ صرف ٹیم کے ارکان کو بلکہ ان کے اہل خانہ کو بھی تحائف دے رہے ہیں۔ کرک بز کے مطابق، ایک مداح کے طور پر ظاہر کرتے ہوئے، وہ کھلاڑیوں، کوچز اور تبصرہ نگاروں کے اہل خانہ کو زیورات کی دکانوں اور مہنگے ہوٹلوں میں لے جانے کی پیشکش کرتا ہے۔ یہی نہیں اس نے سوشل میڈیا کے ذریعے بیرون ملک مقیم افراد سے بھی رابطہ کیا۔
