ییرے وان، 18جولائی (سیاست ڈاٹ کام) آرمنیا کے شہر ازوان میں پولیس اور مظاہرین کے درمیان جھڑپ کے بعد 13 افراد کو ہاسپٹل میں داخل کرایا گیا ہے ۔ وزارت صحت کی ترجمان ایلینا نیکوگوشیان نے یہ اطلاع دی۔مظاہرین نے حکام سے جنگل میں لکڑی کاٹنے کی اجازت کے مطالبے کے سلسلے میں مظاہرہ کیا اور جارجیا جانے والی قومی شاہراہ کو بند کر دیا جس کے نتیجے میں ان کی سیکورٹی اہلکاروں کے ساتھ جھڑپ ہوگئی۔ رپورٹ کے مطابق مظاہرین نے پولیس پر سنگباری کی۔ایلینا نے کہا، ‘‘ازوان جھڑپ کے بعد 13 افراد کو شہر کے ہاسپٹل میں داخل کرایا گیا ہے جبکہ زخمیوں کا علاج کیا جا رہا ہے ‘‘۔ گزشتہ ہفتے ، آرمینائی پولیس کے سربراہ ولیری اوسی پین نے حکام کو ہدایت دی تھی کہ جنگل میں سڑک کے کنارے اور ان کے ارد گردنگرانی رکھیں اور دیکھیں کہ آیا مقامی آبادی غیر قانونی طور پر لکڑی کی کٹائی کررہے ہیں یا نہیں۔ تاہم، پولیس کا کہنا ہے کہ ان کی مظاہرین کے ساتھ جھڑپ قومی شاہراہ کو بند کرنے کے سلسلے میں ہوئی تھی۔