حیدرآباد،6 نومبر(یواین آئی) ملازمت سے رجوع بکار ہونے کے لئے ہڑتالی آرٹی سی ملازمین کو دی گئی مہلت کے منگل کی شب اختتام کے پیش نظر تلنگانہ کے وزیراعلی کے چندرشیکھرراو نے وزیر ٹرانسپورٹ پواڈا اجئے کمار،ٹرانسپورٹ کے محکمہ کے اعلی عہدیداروں کے ساتھ کیمپ آفس پرگتی بھون میں اجلاس منعقد کیا۔اس اجلاس میں آرٹی سی کی ہڑتال پر متبادل انتظامات سے ہائی کورٹ کو واقف کروانے کے مسئلہ کا بھی جائزہ لیا گیا۔علاوہ ازیں عوام کو دشواری سے بچانے کے لئے کئے جانے والے انتظامات پر بھی بات چیت کی گئی۔وزیراعلی نے انتباہ دیا تھا کہ منگل کی شب تک ہڑتالی ملازمین کے ڈیوٹی سے رجوع بکار نہ ہونے کی صورت میں آرٹی سی کی نجی کاری کی جائے گی۔وزیراعلی کے اس انتباہ کے باوجود ہڑتالی ملازمین سے کوئی بہتر ردعمل نہیں آیا۔منگل کی شب تک صرف 360ملازمین ہی ڈیوٹی سے رجوع بکار ہوئے ۔ان میں بس بھون میں انتظامی کام کرنے والے 200ملازمین شامل ہیں۔ گریٹر حیدرآباد زون میں 62، حیدرآباد زون میں 31دیگر ڈپوز کے حدود میں بقیہ افراد ملازمت سے رجوع ہوئے ۔ ان میں بیشتر ڈرائیورس کنڈکٹرس نہیں ہیں۔
