ممبئی ، 18 اگست (ایجنسیز) اداکار شاہ رخ خان کے بیٹے آرین خان کی ہدایت کاری میں بننے والی پہلی سیریز ’دی بیڈز آف بالی ووڈ‘ کی پہلی جھلک اتوار کو منظر عام پر آئی ہے۔ طویل انتظار کے بعد شاہ رخ کے بیٹے آرین بالآخر ڈائریکٹر کی حیثیت سے ناظرین کے سامنے آ گئے ہیں۔ نیٹ فلکس اور ریڈ چلیز انٹرٹینمنٹ کے بیانر تلے بننے والی ویب سیریز ’دی بیڈس آف بالی ووڈ‘ کا پہلا ٹیزر جاری کر دیا گیا ہے۔ اس سیریز کے ذریعے آرین خان نئے اور منفرد انداز میں فلم انڈسٹری میں قدم رکھ رہے ہیں۔ اگرچہ نیٹ فلکس نے ابھی تک اس سیریز کے ریلیز کا باضابطہ اعلان نہیں کیا ہے لیکن مداحوں میں بے پناہ جوش و خروش پایا جاتا ہے۔ ٹیزر کا آغاز رومانی اور کلاسک انداز میںہوتا ہے، جو ناظرین کو پرانی فلموں کی یاد دلاتا ہے جیسے ’محبتیں‘۔ لیکن جیسے ہی ناظرین اس رومانس میں کھو جاتے ہیں، ایک مضحکہ خیز موڑ آتا ہے جو کہانی کو بالکل نیا روپ دیتا ہے۔ ٹیزر میں آواز ضرور آپ کو شاہ رخ خان کی یاد دلائے گی، لیکن اس میں رویہ اور لہجہ مکمل طور پر آرین خان کا ہے۔ اس سے یہ واضح ہوتا ہے کہ آرین اپنے والد کی امیج سے مختلف اپنی دنیا بنانے کی تیاری کر رہے ہیں۔ پہلے ہی لمحے میں، آرین خان کہتے ہیں، ’’بالی ووڈ… جسے آپ نے برسوں سے پیار کیا ہے، میں بھی وہی کروں گا۔ بہت پیار… اور تھوڑا سا وار۔‘‘ اس ڈائیلاگ سے ناظرین کو اس سیریز میں نہ صرف گلیمر اور رومانس دیکھنے کو ملے گا بلکہ اس کے ساتھ ساتھ ڈھیر سارا مسالا، طنز و مزاح بھی نظر آئے گا۔ یہ صرف ویب سیریز نہیں ہے، یہ بالی ووڈ کے بدلتے نظریے اور تناظر کو بھی دکھاتی ہے۔ ایک طرف پرانی فلموں کا رومانی انداز ہے تو دوسری طرف آرین خان نے آج کی نوجوان نسل کے بولڈ اور اسٹائلش انداز کو اس میں شامل کیا ہے۔
