ملبورن ۔26 مارچ (سیاست ڈاٹ کام)کورونا وائرس کے باعث آسٹریلیا کی نیشنل رگبی لیگ مالی بحران کا شکار ہوگئی ، نیشنل رگبی لیگ میں حصہ لینے والے400 سے زائد کھلاڑیوں کو معاوضے میں 87فیصد کمی کا سامنا ہے۔کورونا وائرس کو عالمی وباء قرار دیا جا چکا ہے جس کے باعث کھیلوں کے مقابلے تعطل کا شکار ہیں اور اب کھیلوں کی تنظیموں کو مالی بحران کا بھی سامنا کرنا پڑنے لگا ہے۔ میڈیا رپورٹس کے مطابق آسٹریلیا کی نیشنل رگبی لیگ کومالی بحران کا سامنا ہے جس کی وجہ سے کھلاڑیوں کے معاوضوں میں 87 فیصد کمی کی جا سکتی ہے۔ نیشنل رگبی لیگ اس وقت تعطل کا شکار ہے اور اگر کورونا وائرس کے باعث باقی سیزن منسوخ ہوتا ہے تو لیگ کو شدید خسارے کا سامنا ہوگا۔لیگ کے پاس اس وقت31 اکتوبر تک کھلاڑیوں کو معاوضے دینے کے لئے 12 ملین آسٹریلیائی ڈالرز بچے ہیں ، جبکہ کھلاڑیوں کے بقایا جات کے لیے 93 ملین آسٹریلین ڈالرز درکار ہیں۔اس موقع پر لیگ کو بچانے کے لیئے کھلاڑیوں کو معاوضے میں کمی کرنا ہوگا ، پلیئرز اسوسی ایشن بقایا جات کے فارمولے پر بات چیت کرے گی۔کورونا وائرس کی وجہ سے اس وقت ساری دنیا پریشان ہے اور معیشت کو کافی بڑی ضرب لگنے کا خدشہ ہے۔
